Pas përfundimit të konferencës së donatrorëve ku Shqipërisë iu dhuruan plot 1.15 miliard euro kryeministri Edi Rama së bashku me Presidentin e Komsionit Evropian Ursula Von der Leyen iu përgjigjën interesit të gazetarëve që të pranishëm.
Në fjalën e saj Presidentja Ursula Von der Leyen deklaroi se janë pranë Shqipërisë dhe se po bëjnë gjithçka për progresin e vendit. Një nga pikat për të cilat ajo ishte e prerë ishte edhe fakti se pas fazës së parë të dhënies së parave, vjen faza e dytë tepër e rëndësishme që është transparenca në mënyrën sesi këto para do të përdoren.
“Do të çojmë ekspertët tanë për ta zbatuar në mënyrën e duhur projektin e rindërtimit. Jemi të interesuar për progresin e vendit. Është në interesin tonë që Shqipërinë ta mbajmë sa më pranë BE-së. Ne e kemi shtruar rrugën e suksesit që dëshirojmë. Bashkimi Evropian ofron perspektivat më të suksesshme për Shqipërinë dhe Maqedoninë e Veriut për të ecur përpara për hapjen e negociatave. Ne do të hartojmë një raport. Kemi numrat, provat për përpjekjet e bëra drejt BE-së.”, tha Von der Leyen.
Në fjalën e saj presidentja, e pyetur nëse do të ndjekë në çdo hap Shqipërinë dhe se ku do të shkojnë paratë, shprehet se është bërë një marrëveshje me qeverinë e Shqipërisë përsa i përket kësaj gjëje dhe se në fillim të marsit do të botohet një raport i ri për vendin, me qëllim që të krijohet besim nga ana e të gjitha palëve.
“Ne do të kemi një marrëveshje me qeverinë e Shqipërisë. Folëm për këtë gjë, për tu siguruar që parimet bazë të rindërtimit të respektohen. Ne jemi të interesuar për progresin e vendit. Unë kam ofruar dhe do të ofroj të gjithë mbështetjen time për rindërtimin. Është në interesin tonë të përbashkët që Shqipërinë ta mbajmë sa më pranë BE. Ne sapo kemi rishikuar metodologjinë, e cila ka krijuar besim në të gjitha palët, për këtë përpjekje të përbashkët. Po punojmë fort për hapjen e negociatave për Shqipërinë dhe Maqedoninë e Veriut. Unë kam besim, por ka rëndësi që ne do të botojmë një raport të ri për vendin në fillim të marsit, me qëllim që të krijojmë besim në të gjitha palët. Kemi numra dhe prova që progresi është bërë, që ka konsekuencë drejt BE”, shprehet Von der Leyen.
Ndërkohë për kryeministrin Edi Rama ajo që ndodhi në sallën e madhe të konferencës së donatorëve ishte diçka magjike.
“Një falënderim i madh për të gjitha vendet që dhanë donacionet e tyre për rindërtimin e Shqipërisë. Mirënjohje për Kancelaren Angela Merkel. Përmendja e saj nuk do të thotë se të tjerët kanë më pak rëndësi dhe vend tek unë. Nuk e di nëse do të jem në gjendje por do ta shpaguajë këtë me mikpritjen shqiptare. Është një moment fantastik për të gjithë.”, tha Rama
Më tej Rama Rama tha se do të vendos një hudhër në mur kundër syrit të keq për atë që ndodhi në konferencë. “Nuk dua që të kemi një tjetër zhgënjim. Na duhet të nisim një rindërtim shumë inspirues. Do të kemi transparencë dhe do të monitorojmë standardet. Jam kaq i përulur nga gjithçka. Ambicja ime është të kem histori suksesi. U ndjeva aq mirë dhe po mendoja pse nuk jemi pjesë e evropianit. Dëgjova shumë njerëz që vinin bast në mediat online, por e humbën bastin. Së dyti, pasi panë që kontributet po rriteshin thanë eh nuk do t’i menaxhojnë. Por unë u them. Po, mundemi t’i menaxhojmë. Ne do të shpenzojmë si duhet paratë. Është një shumë e madhe për ne dhe ne duhet të bëjmë më të mirë.”, tha me tej Rama.
