12-vjetori i Pavarësisë/ Kryemadhi: Kosova, amaneti i shenjtë i gjakut të të rënëve

Monika Kryemadhi, Kryetare e LSI-së, ka uruar përmes një mesazhi 12 vjetorin e Pavarësisë së Kosovës, ku thekson “Kosova jonë e dashur, martirja e përgjakur në Evropën e kohëve moderne, ëndrra e realizuar e të rënëve për liri!”

Ndërsa shpreh bindjen e palëkundur se kjo ditë e veçantë, do të gjenerojë më shumë energji dhe besim, më shumë përkushtim dhe vendosmëri, për të punuar pa u lodhur asnjëherë për Kosovën europiane, Kryemadhi thekson se 12 vjet në jetën e një vendi nuk janë shumë, por 12 vjet të shtetit të pavarur të Kosovës, kanë shënuar arritje me përmasa epokale po të kemi parasysh se sa shumë luftë e përpjekje, sa shumë sakrifica dhe privacione janë dashur të përballohen.

LEXO EDHE  "Zoti i shqiptarëve është i madh"/ Rama mesazh qytetarëve: Do e fitojmë luftën

“Shpreh mirënjohjen e thellë ndaj Shteteve te Bashkuara te Amerikës, Britanisë së Madhe, Gjermanisë, që ishin krah Kosovës si në ditët e luftës së përgjakshme, ashtu edhe në procesin politik për shpalljen e pavarësisë së saj.

Kosova është amaneti i shenjtë i gjakut të të rënëve, por po aq është edhe ëndrra e bukur e djemve dhe vajzave të saj, ndaj përparimi dhe mirëqenia, prosperiteti dhe zhvillimi i pandalshëm, do ta bëjnë Kosovën edhe më të fortë, edhe më të begatë, edhe më europiane”, shprehet Kryemadhi.