Mbrëmjen e sotme, ora 20:45, luhet gjysmëfinalja e parë mes Milanit dhe Juventusit në Kupën e Italisë
Të dyja skuadrat hyjnë në këtë ndeshje pas humbjeve respektive në kampionat. Të shtunën Juventus humbi me rezultatin 2-1 kundër Veronës ndërsa Milani shpërdoroi avantazhin e dy golave të pjesës së parë për të humbur 4-2 kundër Interit.
Skuadrat janë përballur 230 herë ndaj njëra-tjetrës, me Juventusin që dominon ndjeshëm me 91 fitore kundër 66 të kuqezinjve.
Nuk do të jetë një përballje vetëm mes skuadrave por dhe mes yjeve respektive të skuadrave, Ibrahimovich kundër Cristiano Ronaldos. Për sa i përket cilësive të futbollistëve dihet që portugezi është “kategori tjetër” por ajo që e ndez sfidën mes tyre janë deklaratat thumbuese të herëpashershme të suedezit ndaj rivalit të sotëm. Nga ana tjetër CR7 gjithmonë ka mbetur i heshtur duke “folur” vetëm në fushën e lojës. Hera e fundit kur të dy janë vënë përballë njëri-tjetrit ishte në vjeshtën e vitit 2013, në një “play off” mes Suedisë dhe Portugalisë për Kupën e Botës në Brazil. Portugezi dominoi plotësisht duke kualifikuar skuadrën portugeze në botëror.
Për sa i përket formacioneve, Pioli nuk pritet të ndryshojë asgjë në krahasim me formacionin që hodhi në fushë në derbin e Madoninës. Ai do të përdorë modulin 4-2-3-1, me referencë offensive Ibrahimovic, të mbështetur nga Castillejo, Calhanoglu dhe Rebic. Kessié me Bennacer në mesfushë, Conti dhe Theo në krahë, Kjaer dhe Romagnoli dueti qendror i mbrojtjes, përpara Donnarumma.
Juventusi humbet Douglas Costa dhe rifillon nga moduli, që përfshin përdorimin e një mesfushori. Sipas parashikimeve, Ramsey do të luajë nga minuta e parë. Në sulm ka hapësirë për Dybala, së bashku me CR7. Në mesfushë shkojmë drejt konfirmimit të qendrës së djathtë, Bentancur, me Pjanic në mes dhe Matuidi, më shumë sesa Rabiot, në të majtë. Në portë Buffon, përpara tij De Ligt dhe Bonucci, me Alex Sandro në të majtë dhe De Sciglio në të djathtë.
