Përfaqësuesit e palëve politike të PS, PD, dhe “opozitës së re” për reformën zgjedhore, kanë zhvilluar këtë të mërkurë një takim me përfaqësues të OSBE/ODHIR. Në përfundim të takimin it, Oerd Bylykbashi zbardhi disa nga propozimet që ka bërë Partia Demokratike: Mes tyre është dhe hetimi nga SPAK i krimeve zgjedhore.
“Ky është takimi i dytë që patëm si grup i katër përfaqësuesve politikë bashkë me ekspertët e ODIHR-it. Opozita sot bëri disa propozime. Janë tre paketa në lidhje me atë që ne mendojmë se është instrumenti që do të ndajë politikën nga krimi, do të godasin krimin zgjedhor, do të rrisin efikasitetin e krimit zgjedhor. Është roli i Policisë së Shtetit në një kuadër masash që garantojnë fushën e barabartë të lojës. Futja e një numri instrumentesh që kanë të bëjnë me të drejtën dhe mbrojtjen e subjekteve që do të denoncojnë krimet zgjedhore, rol të shtuar për Policinë Gjyqësore dhe elementë të tjerë që garantojnë sekretin dhe lirinë e zgjedhësve në procesin e votimit. Po ashtu, kemi bërë propozime në lidhje me rolin që do të ketë Prokuroria, qoftë ajo e zakonshme, qoftë ajo e Posaçme në goditjen e krimit zgjedhor, në mënyrë të veçantë Prokuroria e Posaçme për korrupsionin zgjedhor, qoftë atë aktiv, qoftë atë pasiv dhe futja e këtij të fundit në kompetencat e SPAK-ut, sepse në të shkuarën është lënë jashtë duke dëmtuar një qëllim që ka jo vetëm Kushtetuta por edhe reforma zgjedhore e mëhershme, që krimi i korrupsionit zgjedhor duhet të goditet nga strukturat më të specializuara që kemi ne sot nga reforma në drejtësi. Pra, është një paketë e cila trajton disa çështje nga axhenda e miratuar nga Komisionit dhe bashkë me ekspertizën e ekspertëve të ODIHR-it besojmë se do të ecim me shpejtësi për t’u dhënë drejtim çështjeve që janë me ndikim shumë negativ mbi procesin zgjedhor”, tha përfaqësuesi i PD-së në tryezë Bylykbashai, në një deklaratë për gazetarët.
Lidhur me këtë propozim të PD, u pyet përfaqësuesi në tryezë i PS-së Damian Gjiknuri, i cili deklaroi se do të merret koha e duhur për tu njohur më me hollësi me propozimet.
“Gjithmonë jemi në frymën për të gjetur bashkëpunimin dhe natyrisht për të reflektuar ato gjëra që bëjnë sens, janë të arsyeshme dhe arrijnë standarde konkrete. Jo të bëjmë çdolloj kërkese politike e cila nuk është se mund të bëjë sens apo të mund të realizojë diçka për të përmirësuar standardet zgjedhore”, tha Gjiknuri.
“Korrupsioni zgjedhor është një vepër penale e parashikuar dhe aktualisht në legjislacionin penal që është ndryshuar në vitin 2017. Është një propozim që duhet ta shikojmë, të konsultohemi me ekspertët dhe me prokurorinë apo institucionet përkatëse. Është një gjë që duhet zgjidhur gjithmonë në frymën e kompromisit. Nuk kam një propozim paraprak sepse vetëm sot u njohëm me dokumentin dhe do marrim kohën e nevojshme për të punuar”, shtoi.
Përfaqësuesja e opozitës parlamentare, Rudina Hajdari tha se në tryezën e Reformës Zgjedhore, eksperti i tyre do të përqendrohet në ndryshimin e sistemit zgjedhor.
“Nuk u ra dakord për asgjë, por pati një vullnet të mirë për t’i akorduar ekspertët me njëra-tjetrin dhe si dhe funksionojnë në ditët ne vijim”, shtoi Hajdari.
