Albin Kurti ka nisur vizitën zyrtare në Tiranë, e para që kur mori detyrën e Kryeministrit të Kosovës.
Kurti është pritur me një ceremoni në Pallatin e Brigadave nga Kryeministri Edi Rama, ku pas ekzekutimit të hymnit kombëtar të dy shteteve, ka nisur edhe një takim.
Gjithashtu, Kryeministri i Kosovës do të ketë takime të veçanta me Presidentin, Ilir Meta, Kryetarin e Kuvendit, Gramoz Ruçi, Kreun e PD-së, Lulzim Basha dhe Kryebashkiakun, Erion Veliaj.
Gjatë muajve të fundit raportet mes Albin Kurtit dhe Edi Ramës kanë shënuar përplasje dhe replika, ndërsa nuk dihet nëse ky takim do të mund të sheshojë ato që mund të quhen mosmarrëveshje, veçanërisht përsa i takon mini-shengenit.
Qëndrimi i tij do të zgjasë një gjysmë dite. Nisja drejt Morinës për kthimin në Kosovë është parashikuar në 12.40.
Vizita u paralajmërua nga Kurti gjatë një interviste për Zërin e Amerikës.
Albin Kurti: Unë synoj që javën e ardhshme të vizitoj Tiranën dhe të zhvilloj takime me liderët institucional atje, me kryeministrin Rama, me presidentin Meta, me kryeparlamentarin Ruçi, me kryetarin e opozitës Basha dhe në këtë mënyrë t’i diskutojmë së bashku këto çështje.
`Unë nuk jam kundër iniciativave për bashkëpunim rajonal, mirëpo aty duhet të jetë parimi i reciprocitetit dhe përderisa Republika e Shqipërisë i njeh më mirë fqinjët tanë jugor dhe perëndimor, është Republika e Kosovës ajo që i njeh më mirë fqinjët tanë lindor dhe veriorë dhe në këtë aspekt ne mund të jemi komplementar.
Axhenda e kryeministrit Kurti:
Kryeministri Albin Kurti takim me kryeministrin, Edi Rama.
Vendi Pallati i Brigadave, ora 09:00
10:10- Konferencë e përbashkët për media e kryeministrit Albin Kurti dhe kryeministrit Edi Rama.
Kryeministri Albin Kurti takim me kryetarin e Kuvendit, Gramoz Ruçi.
Vendi: Kuvendi i Republikës së Shqipërisë, ora 10:45
Kryeministri Albin Kurti takim me presidenti, Ilir Meta.
Vendi: Presidenca e Republikës së Shqipërisë, ora 11:20
Kryeministri Albin Kurti takim me kryetarin e Bashkisë së Tiranës, Erion Veliaj.
Ceremonia e dhënies së “Çelësit të Tiranës” për Kryeministrin Kurti.
Vendi: Bashkia e Tiranës, ora 11:55
Kryeministri Albin Kurti takim me kryetarin e Partisë Demokratike, Lulzim Basha.
Vendi: Selia e PD-së, ora 12:20
