Kryeministri i Kosovës, Albin Kurti, e ka thënë prerazi sot në Tiranë, se përpara mini-Shengenit ballkanik i intereson makro-shengeni shqiptar.
Kurti tha se një nga çështjet e diskutuara me Kryeministrin Rama ishte ajo e mini-shengenit.
“Ne jemi për makro-Shengenin shqiptar, përpara mini-Shengenit Ballkanik”, tha Kurti, duke nënkuptuar se ka një divergjencë mes qeverisë së Kosovës dhe asaj Rama lidhur me çështjen në fjalë.
Ndërsa Kryeministri Edi Rama, ka tentuar fillimisht të bëjë një batutë me termin mini-Shengen.
“Nuk e di se kush ia ka vënë emrin mini-Shengen, sepse unë jam edhe i gjatë”, u shpreh Rama, ndërsa theksoi se “makro-shengeni shqiptar është i lidhur me mini-shengenin ballkanik”.
Rama i ka qëndruar idesë se mini-Shengeni rajonal është me shumë rëndësi për rrëzimin e barrierave të panumurta që janë ende në fuqi.
“Ne jemi konsistentë në vazhdën e procesit të Berlinit, të harmonizuar në veprimin tonë dhe na hapet rruga që na është mbyllur gjatë gjithë viteve për të hapur një hapësirë të përbashkët midis dy shteteve: Lëvizje të lirë jo vetëm të mallrave, por edhe të njerëzve, për shkak të rezistencës jo vetëm të Serbisë por edhe të shteteve të tjera.
Këtë rezistencë unë e kam thyer dhe le të mos humbasim kohë, sepse as Serbia as vendet e tjera nuk thonë dot se po bëjmë “Shqipërinë e Madhe”. E kam biseduar me Kryeministrin që të fillojmë bisedimet me agjencitë e sigurisë dhe agjencitë e tjera që të çlirojmë tregtinë nga barrierat”, tha Rama.
Në kuadrin e mini-Shengenit Ballkanik janë zhvilluar 3 takime të nivelit të lartë, një në Novi sad, një në Tiranë dhe një në Ohër, ndërsa Kosova nuk k qenë pjesë e tryezave të organizuara nga Presidenti serb, Aleksandar Vuçiç, Kryeministri Edi Rama dhe homologu i tij maqedonas, Zoran zaev.
