“Respektoni të drejtat e të akuzuarve dhe SPAK duhet të konfirmojë se veprimet e ndërmarra nga policia janë ligjore”. Kështu u shpreh ambasadori i BE-së në Tiranë, Luigi Soreca, duke komentuar operacionin më të fundit policor anti-KÇK, ndërsa vuri theksin në rëndësinë që ka zbatimi i ligjit dhe përputhshmëria që duhet të ketë me shtetin e së drejtës.
Soreca tha se duhet të jetë gjykata ajo që duhet të vendosë mbi sekuestrimin ose jo të pasurive të subjektit.
“Ligji anti KÇK tregon gatishmërinë politike për të trajtuar problemin. Ajo çfarë është e rëndësishme është mënyra sesi do të zbatohet ky ligj. Zbatimi është thelbësor, është kyç. Dhe ne shohim dy kushte kryesore që zbatimi të jetë në përputhje me shtetin e së drejtës: së pari që të drejtat themelore të akuzuarve të respektohen plotësisht, pra të subjekteve që janë të dënuar ose persona që janë në hetim për krimet të organizuara. Të drejtat e tyre do të duhet të respektohen.
Ky është një kusht. Dhe asetet të konfiskohen, sekuestrohen por të respektohet procesi i duhur ligjor në mënyrë që të gjithë të kenë të drejtët tu respektohen të drejtat themelore. Do ta monitorojmë këtë nga afër. Do flasim me SPAK.
Kushti i dytë ka të bëjë me drejtimin e këtij operacioni. SPAK-u siç e dimë nga parashikimet e ligjit duhet të konfirmojë të gjitha veprimet e ndërmarra nga policia dhe t’ia kalojë dosjen gjykatës për marrjen e vendimit për konfiskimin”, tha Ambasadori i BE.
Komentet e Sorecas lidhur me operacionin anti-KÇK vijnë 1 javë pas nisjes në terren të operacionit dhe dërgimit në SPAK nga OFL të rreth 9 dosjeve mbi pronat që u përkasin personave që kanë qenë të dënuar, ndërkohë që për disa prej tyre ka vendime gjykatash të formës së prerë lidhur me pasuritë.
