Zgjedhjet parlamentare do të mbahen ndoshta në 30 qershor 2021. Deklarata është bërë nga Kreu i Grupit Parlamentar socialist, Taulant Balla, pas mbledhjes së Kryesisë së PS-së. Kjo e fundit mësohet se ka diskutuar mbi Kongresin e ardhshëm të PS-së, ku pritet të ketë një ristrukturim të plotë të strukturave të kësaj partie. Balla tha se ristrukturimi do të sjellë një përfaqësim mbi bazën gjinore të barabartë.
“Ky proces nuk do të ndalet, të paktën deri më 30 qershor 2021 kur ne mendojmë se do të mbahen zgjedhjet e ardhshme parlamentare”, tha Balla, që duket se ka zgjedhur t’i përgjigjet deklaratave nga opozita, e cila kërkon zgjedhje të parakohshme si rrugën e vetme për zgjidhjen e krizës.
Balla u shpreh se Kongresi i PS-së do të përcaktojë edhe agjendën politike të kësaj force deri në mbajtjen e zgjedhjeve të ardhshme parlamentare.
“Në kongresin e partisë do miratojmë një axhendë të aktivitetit politik të PS, biem të gjithë dakort që gjithmonë në këto 29 vite kongreset e PS kanë qenë momente të rendësishme në jetën politike të vendit.
Në axhendën politike do ketë një lloj ndryshimi se nuk përmbyllet në 31 dhjetor 2020 por në 30 qershor të vitit 2021 afat në të cilin planifikojmë edhe zgjedhjet e përgjithshme parlamentare, kështu që unë do bie rehat për këtë pyetje për 13 muaj”, tha Balla.
Gjithashtu Sekretari i Përgjithshëm socialist tha se së shpejti socialistët do të kenë një drejtues të degës së PS-së për Bashkinë e Shkodrës, e cila prej muajsh ndodhet në amulli të plotë dhe pothuajse të gjitha grupet e punës, nuk kanë arritur të zgjedhin një drejtues.
Gjithashtu zyrtari i PS-së ka zgjedhur të shigjetojë Presidentin e Republikës, Ilir Meta, lidhur me situatën e krijuar në disa bashki, ku kryebashkiakët e caktuar më 30 qershor dorëzuan mandatet për shkak të ligjit të dekriminalizimit. Balla tha Prefektët kanë njoftuar Presidentin mbi situatën dhe ai nuk ka përmbushur detyrimet kushtetuese për caktimin e datës së mbajtjes së zgjedhjeve të pjesshme vendore.
