Mbrëmjen e sotme ora 20:45, luhet derbi i madh i Madoninës, mes Interit dhe Milanit, ndeshje kjo e vlefshme për javën e 23-të të Serisë A.
Derbi i Milanos kombinon historinë, dramën dhe një stadium unik që e ndajnë të dyja skuadrat. Gjithmonë derbi ka një arsye të fortë për të luftuar për fitoren siç është dhe rasti i këtij viti ku fitorja për të dyja ekipet ka vlera të mëdha.
Interi vjen si një nga dy skuadrat kryesore për titullin kampion në Seria A. Antonio Conte e ka revulocionuar plotësisht skuadrën si nga ana e mentalitetit ashtu dhe në cilësinë e saj.
Milani nga ana tjetër ndoshta jo në nivelin e Interit, por që duket se gjërat po shkojnë në drejtimin e duhur dhe në anën tjetër të qytetit, pas rezultateve pozitive gjatë javëve të fundit.
Zikaltërit kanë një tjetër shtysë për të fituar derbin dhe ajo është humbja e Juventusit mbrëmjen e djeshme kundër Veronës. Në rast suksesi Interi do të barazonte me pikë bardhezinjtë duke hapur gjithçka për sa i përket luftës për titull në Serinë A.
Për kuqezinjtë fitorja do ta afronte më shumë skuadrën në zonën europiane dhe do të ngrinte moralin e skuadrës për pjesën tjetër të sezonit.
Për këtë ndeshje Antonio Conte nuk do të mundë të llogarisë shërbimet e Lautaro Martinez dhe Alessandro Bastoni, të cilët janë pezulluar, ndërsa mesfushorët Stefano Sensi dhe Roberto Gagliardini nuk janë 100% të gatshëm. Portieri dhe kapiteni Samir Handanovic ka shumë pak mundësi të luajë, sepse nuk stërviti me topin as të shtunën për shkak të gishtit të thyer.
Ndërsa nga ana tjetër, rikthehen Zlatan Ibrahimovic dhe Simon Kjaer, të cilët munguan në barazimin 1:1 kundër Hellas Verona për shkak të gripit.
