“Vrapo kundër korrupsionit” ishte moto e maratonës së organizuar nga Delegacioni i BE-së në Tiranë, ku krahas ambasadorit Luigi Soreca, ishte edhe ministrja e Drejtësisë, Etilda Gjonaj.
Madje Soreca ka zgjedhur të vrapojë me syze, ndoshta duke ndjekur modelin e Njësisë Speciale OFL, e cila shfaqet me syze në operacione.
Ambasadori i BE në Shqipëri, Luigi Soreca, shkruan në Twitter se vrapit ju bashkuan ditën e djeshme 600 persona në Parkun e Liqenit të Tiranës. “Sa më shumë të jemi, aq më e lehtë lufta”, shkruan Soreca, i cili duket se ka zgjedhur të vrapojë në krahë të ministres së Drejtësisë, Etilda Gjonaj.
Të dy duken të buzëqeshur në foton e shpërndarë në rrjetet sociale.
Në aktivitet morën pjesë edhe ambasadori i Mbretërisë së Holandës në Shqipëri, Guusje Korthals Altes, si dhe përfaqësues nga bashkia e Tiranës, Dhoma Ndërkombëtare e Tregtisë dhe partnerë të tjerë të biznesit.
Ministrja Etilda Gjonaj dhe ambasadori Luigi Soreca, në nisje të ceremonisë, përshëndetën të pranishmit, teksa më tej u zhvillua dhe maratona e vrapit përgjatë kodrave të liqenit artificial të Tiranës.
