Tirana kremton këtë vit 100 vjetorin e themelimit si kryeqytet i Shqipërisë. Nga pikëpamja arkitekturore dhe historike, studiuesi dhe kritiku i artit, Rubens Shima, i ftuar në RTV Ora thotë se ky është 100 vjetori i shkatërrimit dhe asgjesimit të Tiranës.
Në gjykimin e tij, në Tiranën e sotme nuk ka mbetur asnjë gjurmë nga Tirana e vjetër dhe goditjen kryesore sipas e tij e ka marrë pas viteve ’90.
“Nëse flasim për 100 vjetorin e Tiranës mund të quhet 100 vjetori i shkatërrimit apo asgjesimit të Tiranës. Ky qytet që jetojmë sot nuk ka asnjë lidhje me Tiranën. Tirana e vjetër është plotësisht e asgjesuar. Dëmi kryesor dhe shkaku i gjithë kësaj batërdie që ndodhi në Tiranë në këto tre dekada ka qenë politika. Çdo qytet ka një moment kulmor dhe ka dhe një moment që ecën në vijë të drejtë. Kthehet në një ishull të së shkuarës.
Kulmi i Tiranës arrin nga vitet ’30-’40. Më pas Tirana fillon të tatëpjetën. Për arsye ideologjike gjatë komunizmit ka pasur ndërhyrje, ka pasur ndërtime. Shkatërrimi më i madh për arsye korruptive ndodh pas viteve ’90.
Sot në Tiranë nuk gjen asnjë gjurmë apo shtresëzim të asaj që e formuan dikur. Gjithë zona e hartës historike është në kërcënim të vazhdueshëm nga presioni i madh i axhendave të ndërtimit që ndodhin në këtë qytet”, thekson Shima. /Oranews/
