Sot në orën 18:00, luhet në “Loro Boriçi” sfida mes Vllaznisë dhe Tiranës. Ndeshje kjo e cila hap javën e 21-të të kampionatit.
Tirana vjen në këtë sfidë pas 6 fitoreve radhazi në kampionat, duke qenë perfekte që nga koha kur skuadrën e mori në drejtim Emmanuel Egbo. Kryeqytetasit renditen në vendin e dytë me 37 pikë, 1 më pak se Kukësi i vendit të parë.
Nga ana tjetër të zotët e shtëpisë, Vllaznia, nuk po kalojnë një moment të mirë teksa renditen të shtatët në kuotën e 28 pikëve. Skuadra e drejtuar nga Mirsad Jonuz, vjen pas dy barazimeve kundër Laçit dhe Bylisit.
Një sfidë kjo shumë e rëndësishme për të dyja skuadrat. Fitorja për Tiranën, do ta konsolidonte skuadrën si një nga favoritet kryesore për titullin kampion ndërsa Vllaznia do të ngjitej lart në tabelë për të synuar pse jo një vend në Europë.
