25 të dyshuar me lidhje me një rrjet të krimit të organizuar shqiptar u arrestuan gjatë një operacioni të njëkohshëm të kryer në Belgjikë, Spanjë, Holandë, Gjermani dhe Francë, i cili pa përfshirjen e mbi 600 oficerëve të policisë në terren.
Detajet e aksionit të djeshëm i jep INTERPOL, që raporton se, kjo goditje pason një hetim kompleks të nisur në vitin 2017 nga Policia Vendore e Antwerp në Belgjike, në bashkëpunim me Policinë Federale Belge, Gardën Civile Spanjolle, Policinë Hollandeze etj, Policinë Gjyqësore Franceze dhe Zyrën Federale të Policisë Kriminale Gjermane, Policinë e Shtetit Gjermane dhe Grupn e Përbashkët tw Hetimit të Drogave të Zyrës Shtetërore të Policisë Kriminale të Saksonisë-Anhalt dhe Zyrës Doganore të Hanoverit.
Hetimi i drejtuar nga Policia Lokale e Antwerp zbuloi se droga ishte duke u kontrabanduar e fshehur në kontejnerë në Belgjikë përpara se të shpërndahej më tej në të gjithë Evropën duke përdorur automjete të pajisura me ndarje të sofistikuara, të fshehura.
I njëjti grup kriminal besohet gjithashtu se menaxhonte plantacionet e kanabisit në Spanjë dhe Gjermani, ku ata kultivuan dhe përpunuan marijuanën, përpara transferimit në vendet e tjera të Evropës për shitje dhe shpërndarje të mëtejshme.
Deri më sot, ky operacion ka rezultuar në:
- 9 arrestime në Belgjikë, 6 arrestime në Spanjë, 3 arrestime në Holandë, 6 arrestime në Gjermani dhe një arrestim tjetër në Francë, duke e çuar numrin e përgjithshëm të arrestimeve në 25;
- Rreth 30 bastisje në banesa;
- 6 plantacione marihuane të zbuluara;
- konfiskimi i 60.000 €, telefona celular, armë dhe municione.
Drejtuesi i dyshuar i këtij rrjeti është midis të arrestuarve në Belgjikë nga një skuadër e Policisë Lokale të Antwerpit.
Kjo organizate ishte strukturuar në mënyrë hierarkike, me degë që funksiononin ndërkombëtarisht. Disa nga anëtarët e saj, sot të arrestuar, kanë një histori të trafikut të drogës në vende të ndryshme.
Europol raporton se “e mbështeti këtë hetim duke siguruar një ekspertizë të përsosur dhe një mbështetje të gjerë analize dhe duke lehtësuar shkëmbimin e informacionit përmes kanaleve të sigurta. Një numër takimesh operacionale u organizuan nga Europol në të gjithë Evropën me qëllim plotësimin e boshllëqeve hetimore në nivelin ndërkombëtar dhe koordinimin e veprimeve të njëkohshme që synojnë çmontimin e gjithë strukturës së këtij grupi kriminal”.
Në ditën e aksionit, dy ekspertë të Europol u vendosën një në Belgjikë dhe një në Spanjë për të lejuar shkëmbimin e informacionit në kohë reale dhe për të mundësuar kontrollet e të dhënave të mbledhura në bazën e të dhënave të Europol. Eurojust asistoi në ekzekutimin e Urdhrave Evropianë të Hetimit dhe Letrave të Kërkesave midis palëve të përfshira.
Ky hetim është pjesë e rrjetit italian “Direzione Investigativa Antimafia (DIA) Project @ON network”, një iniciativë për të goditur grupet e krimit të organizuar të llojit mafioz, aktiv në Evropë. Projekti u nis në selinë e Europol në 2018 dhe përfshin 15 shtete anëtare dhe Europol. Në kuadër të këtij projekti, tre ekspertë italianë të Anti-mafias u vendosën në qendrën e komandës në Belgjikë për këtë operacion të veçantë, për të mbështetur aksionet e ndryshme që ndodhin në terren.
/BoldNews/
