Europol ka njoftuar sot finalizimin e një operacioni ndërkombëtar të shtrirë në 43 shtete, përfshi edhe Shqipërinë e Kosovën, për shkatërrimin e një rrjeti të gjerë të trafikut të qenieve njerëzore.
Europol bën me dije se gjatë këtij operacioni në Shqipëri janë shpëtuar 3 prej viktimave ndërsa 1 trafikant është arrestuar dhe 1 tjetër është shpallur në kërkim.
“Shqipëria mbrojti 3 viktima kineze të shfrytëzimit seksual. Viktimat u rekrutuan në Dubai, Emiratet e Bashkuara Arabe, nga një organizatë kineze e trafikimit të qenieve njerëzore dhe më pas u transferuan në Shqipëri, ku iu desh të ofronin shërbime seksuale në një sallon masazhi. Deri më tani, 1 trafikant është arrestuar dhe 1 tjetër është shpallur në kërkim”, thuhet në njoftim.
Në rang global janë arrestuar 158 trafikantë njerëzish dhe 1194 viktima janë të shpëtuara.
Operacioni me emërtimin e koduar “Zinxhiri Global” u përqendrua te trafikimi për shfrytëzim seksual, kriminalitet të detyruar dhe lypje të detyruar.
Operacioni përfshiu gati 15 000 efektivë nga 43 vende të ndryshme dhe u realizua në bashkëpunim me policinë, rojet kufitare, inspektorët e punës, si dhe autoritetet tatimore dhe doganore. Viktimat ishin nga 64 vende, kryesisht nga Rumania, Ukraina, Kolumbia, Kina dhe Hungaria.
Shumë prej tyre ishin trafikuar përtej kufijve, madje edhe kontinenteve, gjë që tregon për natyrën globale të trafikimit.
Hetimet tregojnë se shumica dërrmuese e viktimave të shfrytëzimit seksual janë gra dhe të rritura, ndërsa shfrytëzimi i të miturve lidhet zakonisht me lypjen dhe veprimtari kriminale të detyruar si xhepitja. Në shumë raste, viktimat shfrytëzohen nga anëtarët e familjes, gjë që e bën më të vështirë mbrojtjen e tyre.
Po ashtu Europol njofton se u kryen sekuestrime të konsiderueshme, duke përfshirë: 277,669 euro në para të gatshme, 1 ton kanabis, 899 njësi të narkotikëve të tjerë, 30 armë zjarri, 15 përbërës shpërthyes, 65 dokumente të rreme dhe 5 prona të paluajtshme.
