Ardian Doçaj, i kërkuar si i dyshuar se ka gisht në pengmarrjen e Jan Prengës më 17 janar 2020, i cili më pas dyshohet se u vra, është ndaluar sapo shkel në kufirin shqiptar në Hanin e Hotit.
Në një komunikim për mediat mbrëmjen e djeshme, Doçaj paralajmëroi se do të kthehej në Atdhe për t’u përballur me drejtësinë dhe mohoi të ketë lidhje me ngjarjen kriminale. Doçaj, i cili ka vite që jeton në Angli, është vetëdorëzuar rreth orës 15:30 në pikën kufitare të Hanit të Hotit.
Pas ndalimit në kufi, u shoqërua në Drejtorinë Vendore të Policisë Shkodër.
Në kufi, kanë qenë gjatë ditës së sotme edhe avokati Agim Martini dhe vëllai i tij.
Edhe vëllai i Ardian Doçajt u shpreh se ai nuk ka asnjë lidhje me botën e krimit.
“Vëllai im nuk i ka asgjë borxh Shqipërisë dhe as jetë krimi. Ka ikur nga Shqipëria më 2 nëntor dhe është kthyer vetë me vullnetin e tij se është shpallur në kërkim në lidhje me rrëmbimin, s’ka lidhje me jetën e krimit. I lutem shtetit shqiptar të mos marrin djem nënash në qafë se s’i kemi gjë borxh. Nga ora 5-8 të darkës më kanë marrë, më kanë shpall që gjëra atë mëtejshme që nuk i kam as unë as një pjesëtar i familjes sime”, tha ai për “Report Tv”.
Një ditë më parë, OFL kërkoi sekuestrimin e pasurive të Ardian Doçajt, me arsyetimin se dyshohet se janë përfituar nga aktivitete të jashtëligjshme.
Lidhur me krimin, janë arrestur dhe lënë në arrest me burg 5 persona, ndërsa disa të tjerë janë shpallur në kërkim policor. Dyshohet se pengmarrja ndodhi për shkak të konflikteve për mosdorëzimin e një sasi droge nga vëllai i Jan Prengës, i cili ndodhet në burg në Angli, te autorët e dyshuar. /BN/
