Mesfushori i Chelsea-t, Mateo Kovaçiç në një intervistë për revistën “Four Four Two, zbuloi arsyen që vendosi të largohej nga Reali i Madridit dhe të bashkohej me blutë në Londër.
Ai gjithashtu foli edhe për ngjashmëritë mes Zidane dhe Lampard për sa i përket stilit të të drejtuarit, ndërsa edhe pse e vlerëson maksimalisht francezin, kroati deklaroi se ai meritonte të luante në një nga tre finalet e Ligës së Kampioneve.
“Ishte bukur të luaje për Zidane, por mendoj se mund të më ishte dhënë mundësia të luaja në finalen e tretë të Ligës së Kampioneve”.
Në sezonin e fundit që luajti me “Los Blancos”, Kovaçiç ishte aktivizuar në fazën e 1/16-ve, në çerekfinale dhe në gjysmëfinale të Champions-it, por ditën e aktit të fundit mbeti jashtë: “Kjo ishte arsyeja e pakënaqësisë sime, por futbolli është i tillë dhe ne u ndamë pa probleme të mëdha”.
Pas Kupës së Botës në verën e 2018-s, Kovacic u largua nga Reali dhe nisi një jetë të re te Chelsea, ku akoma luan nën urdhërat e Frank Lampard.
Kroati e krahasoi trajnerin aktual me Zidane: “Lampard është i jashtëzakonshëm. Ai stërvit me të njëjtin personalitet që kishte si lojtar. Ka qenë një burim frymëzimi për të gjithë ne. Lampard është i ngjashëm me Zidane, në mënyrën se si duhet të jetë trajner”.
