*Nga Erl Kodra
Gotham është kryeqyteti i krimit ku mafia, politika dhe biznesi janë shkrirë në një. “Pax Penguina” është një periudhe në të cilën kriminelët marrin “licenca” për të kryer krime pa u arrestuar nga policia, të siguruara nga Oswald Cobblepot, një mafioz vrasës ekstravagant dhe origjinal, por njëkohësisht kryebashkiak i Gotham City. Kryebashkiaku i ri arrinë të ulë nivelin e krimit në qytet nën nivelin historik, duke fituar kështu mbështetjen e publikut.
Pax Penguina është një imitim grotesk i Pax Romana (latinisht “Paqja Romake”); një periudhë e gjatë paqeje dhe stabiliteti relativ e Perandorisë Romake, e periudhës mes Cezar Augustit dhe Marcus Aurelius, i fundmi i “Perandorëve të mirë”. Kjo periudhë zgjati përafërsisht 206 vjet (27 para Krishtit deri në vitin 180) ku Perandoria Romake arriti shtrirjen më të madhe territoriale dhe popullsia e saj arriti në 70 milionë njerëz – një e treta e popullsisë së botës.
“Pax Rilindja” i ka fillimet në vitin 2013. Thelbi i paktit është se Politika e Lartë, Mafia, Organizatat Kriminale, Parlamenti, Grupet Lokale të Krimit të Organizuar, Institucionet Qeverisëse, Kultivuesit e Drogave të Lehta, Policia e Shtetit, Trafikuesit e Drogave të Forta, Ministria e Brendshme, Përdhunuesit dhe Manjakët Seksual, Policia e Shtetit, Vrasësit me Profil të Lartë Publik, Prokuroria e Përgjithshme e Përkohshme (PPP), Oligarkët dhe Biznesi i Madh, Erion Veliaj dhe Shkëlqim Fusha Shpk, Shërbimi Inteligjent dhe Skafistët, Kompanitë Ofshore dhe Partneriteti Publik Privat (PPP), Ndërtuesit dhe Trafikantët e Qenieve Njerëzore, Ambasadori Donald Lu, Klement Balili dhe Emiliano Shullazi, Romana Vlahutin dhe Agron Geron Xhafa, Ilir Beqja dhe Vilma Nushi, Edi Rama dhe Shefqet Kastrati, së bashku me Shukri Xhelilin, Sadri Abazin, Elvis Roshi dhe Rrahman Rraja, Fatmir Xhafa, Saimir Tahiri dhe Arta Marku, kanë arritur shkallën më të lartë të mirëkuptimit dhe bashkëpunimit. Mbështetja dhe mirëkuptimi, por edhe bashkëpunimi financiar ka arritur nivele të paimagjinueshme, sa kohët e fundit u themelua edhe Grupi Multimedial “Air Albania”, një korporatë mediash audiovizive ku janë integruar promovimi dhe mbrojtja e vlerave më të mira të Pax Rilindja.
Parimi bazë i funksionimit është se të gjithë anëtarët e Sektit Pax Rilindja kryejnë punët e njëri tjetrit dhe përdorin Licensat e njëri tjetrit. Paqja funksionon mrekullisht. Vrasjet janë në minimumin historik.
Populli?
Qeveria dhe Mediat thonë se populli është i lumtur.
*Publikuar para një viti
