Kreu demokrat Lulzim Basha tha se ndihej i inkurajuar pas takimit që zhvilloi në selinë e PD-së me Ambasadoren e SHBA-së, Yuri Kim.
“Po bëjmë gjithçka për t’u dhënë shqiptarëve shpresë”, theksoi Basha në një prononcim për mediat, pas takimit që zgjati disa minuta.
Kreu demokrat u shpreh se dita e zhvillimeve politike sot dhe atyre që do të vijnë do të jetë plot me lajme, me prioritete, me zhvillime.
“Për një gjë ju siguroj, se gjithçka që po bëhet po bëhet për t’i shërbyer një qëllimi që shkon përtej Partisë Denokratike dhe opozitës, qëllimi për t’u dhënë shqiptarëve një rrugë shprese dhe dalje nga kriza. Kështu që në këtë kuptim ndjehem i inkurajuar nga takimet sot dhe do të vazhdoj t’ju mbaj të informuar”, theksoi kreu demokrat.
Yuri Kim mori zyrtarisht detyrën e ambasadores së SHBA në Tiranë rreth dy javë më parë, kur dorëzoi letrat kredenciale te Presidenti Ilir Meta. Ajo ka nisur një seri takimesh me drejtues të institucioneve kryesore në vend, politikës dhe atyre të Drejtësisë.
“Prioriteti im i parë është ta ndihmoj Shqipërinë të bëhet aleate më e aftë e NATO-s dhe një bastion më i fortë sigurie. Shqipëria po punon për të qenë edhe një udhëheqëse në Ballkan për luftën kundër terrorizmit dhe kundër ekstremizmit të dhunshëm. Nga shoqëria civile te bashkësitë fetare, nga organet vendore e ndërkombëtare të zbatimit të ligjit deri te shkollat e arsimtarët, jemi bashkë për ta ndihmuar Shqipërinë që të zhdukë si kërcënimet vendase, ashtu edhe ato ndërkombëtare.
Së dyti, ne do të vazhdojmë të mbështesim fort zhvillimin demokratik të Shqipërisë. Forcimi i institucioneve dhe praktikave demokratike do të forcojë kandidaturën e Shqipërisë për në Bashkimin Evropian. Ne duam ta shohim Shqipërinë të luajë një rol më të fortë në familjen evropiane të demokracive.
Së treti, duam të rrisim mundësitë e biznesit si për kompanitë amerikane ashtu edhe ato shqiptare. Ka shumë potenciale të pashfrytëzuara në Shqipëri, për prodhuar, konsumuar dhe për të qenë novatorë”, ka deklaruar diplomatja amerikane kur nisi detyrën e ambasadores në Tiranë.
