Një ndjekje si në skenarët e “Fast & Furious” ka nisur nga Korça dhe ka përfunduar në Krastë të Elbasanit. Drejtuesi i një automjeti tip “Volfsvagen Pasat”, nuk i është bindur urdhrave të përsëritura të policisë për të ndaluar dhe për këtë shkak forcat e rendit i janë vënë pas. Ndjekja ka përfunduar me një aksident të shumëfishtë me 5 persona të plagosur, mes tyre një efektiv policie. Adriana Latifi, 35-vjeçe, Albert Cani 49-vjeç, Dorina Haizi 34 vjeçe, Eugen Abdurrazaku (efektiv policie), janë personat që mbetën të lënduar.
Shoferi i “Volfsvagenit”, Aldiron Shehu nga Gjirokastra, 27 vjeç, është ndaluar më pas nga policia. Mësohet se në dëshminë e dhënë për uniformat blu, ai ka thënë se një fuoristradë i ishte vënë nga pas që në Devoll, duke e detyruar të largohej me shpejtësi dhe rrjedhimisht nuk i ndaloi postblloqeve të policisë. Policia është duke verifikuar këtë version të të riut.
Fillimisht, u raportua se kishte dyshime që gjatë ndjekjes mund të ishte qëlluar me armë zjarri, por policia deklaroi se nuk kishte të shtëna.
Ndjekja
Burime zyrtare nga policia e Elbasanit njoftuan se: rreth orës 09:00, Salla e Drejtimit Korçë, ka njoftuar Sallën e Drejtimit të DVP Elbasan se mjeti tip Pasat i zi me targa Greke IEH 3922, nuk i ka ndaluar shërbimeve të policisë Korçë dhe Pogradec dhe është larguar me shpejtësi në drejtim të Elbasanit.
Menjëherë në Librazhd është ngritur pikë kontrolli e përforcuar, por drejtuesi i mjeti sa ka parë policinë ka marrë përpara sinjalistikën e vendosur në rrugë sipas procedurës për pikë kontrolli dhe nuk i është bindur urdhrit të policisë për të ndaluar duke rrezikuar jetën e punonjësve të policisë dhe ka vijuar me shpejtësi të madhe në drejtim të Elbasanit.
Shërbimet e Policisë së Librazhdit janë vënë në ndjekje të mjetit deri në Elbasan duke mbajtur komunikim me shërbimet policisë në Elbasan.
Forcat Shqiponja, ato të Patrullave të Përgjithshme dhe të Qarkullimit Rrugor, në hyrje të qytetit Elbasan në aksin rrugor Librazhd-Elbasan, kanë ngritur pikë kontrolli duke kontrolluar rrugën.
Aksidenti
Drejtuesi i mjetit ka tentuar të largohet duke goditur makinën e policisë dhe dy mjete të tjera.
Si pasojë është plagosur një punonjës policie dhe 3 shtetas. Efektivi i policisë është dërguar drejt Tiranës për mjekim të specializuar. Të lënduarit raportohet se ndodhen jashtë rrezikut për jetën.
Drejtuesi i mjetit shtetasi Aldiron Shehu 27 vjeç, banues në Gjirokastër është shoqëruar në Polici për veprime të mëtejshme.
Precedenti dhe çfarë u gjet në mjet
Ky drejtues mjeti edhe në vitin 2018 , ka kryer të njëjtat veprime duke mos ju bindur urdhrit të punonjësit të policisë për të ndaluar.
Nga kontrolli i mjetit nuk u gjetën armë apo lëndë narkotike, por vetëm disa targa automjetesh.
Prokurori Ritvan Sukaj, bashkë me një grup hetimor, ndodhen në vendngjarje.
/BN/
