Drejtuesi i Federatës Shqiptare të Futbollit, Armand Duka, ka qenë i ftuar në emisionin “Jo vetëm modë” ku ka folur gjerë e gjatë rreth futbollit, pasioneve të tij dhe familjes. Ai ka treguar në studio momentin kur ka mësuar se ai dhe e shoqja do bëheshin prindër për herë të parë me një vajzë, ndërkohë që prisnin për një djalë.
Duka ka rrëfyer se ishte i fiksuar keq pas një djali dhe ky lajm e kishte mërzitur fillimisht shumë. Si ai edhe e shoqja e kishin pritur me të qara por tashmë e ka kuptuar që është mërzitur kot.
“Jo në asnjë mënyrë s’e doja gocë. Nuk kishim shkuar domethënë ta shikonim çfarë ishte. Diku në muajin e tetë të shtatzënisë, ngaqë kishte një problem, shkoi u vizitua dhe e pa. Mua nuk donte të ma thoshte, por ma tha.
Qaj unë, qaj ajo se nuk donim gocë, donim çun. Mua më ishte fiksuar djalë, djalë. Edhe mu duk si fundi i botës që ishte vajzë, por kam bërë gabim të madh, se ishte vajzë dhe ishte shumë e mire”, ka thënë Duka.
