Kreu i Grupit Parlamentar të PS-së, Taulant Balla, mbrojti sot në Kuvendi aktin normativ të qeverisë mbi atë që njihet si anti-KÇK.
Më konkretisht Balla tha se të fortëve do tu nxihet jeta.
“Nga ky krah i sallës nuk ka për të pasur kurrë askush që do të jetë kundër të çuarjes së reformës në drejtësi dhe po e them shqip, nxirjes së jetës së kujdo që është i përfshirë në veprimtari kriminale dhe që ne kemi sot, për shkak të ngritjes së institucioneve të reja”, u shpreh Balla.
Deputeti socialist është akuzuar publikisht nga opozita në të paktën dy episode, një në lidhje me biznesmenin Edmond Bego dhe në një tjetër rast për Toyota Yaris.
Lidhur me deklarimet e Ballës në Kuvend, ka reaguar nënkryetari i PD-së, Edi Paloka, i cili duke ironizuar shprehet se tashmë suksesi është i sigurtë.
“Tani që Aktin Normativ të “KÇK” doli ta mbrojë dhe Tao Bego Yaris është i siguruar suksesi…
Nesër pritet një peticion mbështetjeje nga gjithë burgjet e vendit si dhe nga ish-ministra, deputetë e kryetarë bashkie të “rilindjes” që janë dënuar apo janë në kërkim nga policia e “rilindjes” duke filluar nga Tahiri…”, shkruan Paloka në rrjet.
