Nga Oerd Bylykbashi
Edi Rama dje u përball me durrsakët që tërmeti i ka lënë rrugëve. Gënjente si në harados dhe pa u skuqur nga shtatlartësia e kryeministrit që të bën gjëmën e të mbyll gojën.
Atij që i thoshte na është prishur shtëpia, ai i thoshte se kishin filluar shume rindërtime. Asnjë nga ata që ishin të pranishëm nuk e paskëshin patur fatin të ishin mes mijëra projekteve.
Atyre që i thonin se nuk kishin marrë ende paratë e bonusit të qerasë dhe qiradhënësi kërkonte paratë, i thoshte se sa kohë kishte letrën e bashkisë në dorë, qiradhënësi është i garantuar. Por asnjë nga ata hallexhinj nuk pohoi ta kishte marrë bonusin dhe qiramarrësit nuk pranojnë letra pa vlerë por para të thata.
Një zonjë që u ankua se po i vidhnin sendet nga shtëpia e braktisur dhe nuk kishte polici të ruante, për Edi Ramën ajo fliste pa lidhje. Ajo i tha që ky ishte fakt. Fundja atë të gjorën kishin vjedhur se në Surrel është Garda e Republikës.
Durrsakëve që u ankuan se askush nuk po bënte riparime, u tha qe qeveria kishte kthyer mbrapsh projektet se qeveria na qënkërkesh shumë e preokupuar që projektet të jenë me standarde, shumë të thella e të plota. Ndërkohë hallexhinjtë as kanë parë njeri t’u shkojë e bëjë verifikime të sakta e jo më projekte.
Kulmi ishte kur e pyesnin se kur do riktheheshin në shtëpitë e tyre: ” Shihni Italinë, ku njerëzit kanë më shumë se dhjetë vjet që ende janë në shtëpi konteiner”. Pra u tha mes rreshtave që meqë në Itali janë rrugëve tash dhjetë vjet, durrsaket do të rrijnë njëzet e kusur vite.
Edi Rama nuk u shpjegoi pse tërmeti shkatërroi Durrësin por shumica e zonave dhe projekteve të rindërtimit që miratoi qeveria e tij do ti ketë në dorë Veliaj në Tiranë. Hienat nuk krahasohen me këta!
Durrsakë, ndajeni ju dilemën nëse ky person që ju qeveris është karagjoz apo mashtrues. Njësoj si ai janë ata që i rrinë pas në këtë cirk turpi. Edhe po të zgjidhni të dy opsionet bashkë, nuk gaboheni aspak. Një gjë është e sigurt: siç ju ka vjedhur votën, paratë dhe shpresën, po ju vjedh edhe vitet që jua ka dhënë Zoti!
