Teksa virusi vdekjeprurës i shfaqur për herë të parë në Kinë, ka prekur qytetarë në vendet fqinje, Presidenti Ilir Meta bën thirrje për vigjilencë.
“Me shpalljen e gjendjes së emergjencës së nivel global nga Organizata Botërore e Shëndetësisë, duhen marrë masat më të forta të mundshme sanitare dhe epidemologjike për të parandaluar këtë virus që të penetrojë në vendin tonë. Aq më tepër kur tashmë janë konstantuar dy raste në Italinë fqinje, por ndoshta edhe në vende të tjera pranë nesh.
Shqipëria ka një përvojë në raste të tilla sikurse ka qenë parandalimi i suksesshëm i SARS-it dikur, ndaj është e rëndësishme të theksohet se çdo nënvlerësim mund të jetë me pasoja kritike. Shpresoj dhe inkurajoj për marrjen e masave më të forta parandaluese”, tha kreu i shtetit në një deklaratë për mediat.
Pyetje: A keni marrë informacione nga institucionet përkatëse zoti Meta?
Presidenti Meta: “Jemi në një proces komunikimi. Mendoj se rastet e konstatuara në Itali dhe ndoshta një rast në një vend tjetër fqinj, tregojnë shumë qartë se ne jemi seriozisht të ekspozuar dhe duhet të parandalojmë me çdo kusht dhe me çdo mjet depërtimin e këtij virusi në vendin tonë. Ashtu sikurse e theksova edhe më parë, Shqipëria ka qenë mjaft e suksesshme për të parandaluar SARS-in përpara 16-17 vitesh dhe i kemi të gjitha mundësitë në rast se të gjithë bëjnë detyrën me përgjegjshmëri maksimale”.
Italia ka zyrtarizuar dy raste me koronavisur. Sipas mediave lokale, bëhet fjalë për dy turistë kinezë tashmë në spital në Romë që kishin shkuar si turistë në Itali. Kryeministri italian Antonio Conte deklaroi se autoritet kanë marrë masat e duhura dhe nuk ka vend për panik. Ndërkohë, në Selanik të Greqisë, u raportua se një shtetas kinez i cili u shtrua në spital me simptoma të ngjashme me ato të virusit vdekjeprurës dhe priten analizat për të përcaktuar nëse është prekur nga koronavirusi apo bëhet fjalë për një grip të thjeshtë. /BN/
