Nga Boldnews.al
Kronikat televizive sot nisën me studentë shqiptarë që mbërritën nga Kina. U nxorën para spitalit Infektiv në QSUT si kavie propagandistike, për të treguar se masat e marra nga shteti janë efikase për të frenuar përhapjen e koronavirusit që ka vënë në alarm Kinën dhe gjithë botën. U ndalaun edhe nëntë kinezë në Doganën e Hanit të Hotit dhe u tha se iu nënshtruan të gjithë kontrolleve shëndetësore dhe u arrit në përfundimin se nuk janë të infektuar.
Nëse kundër këtij virusi bota po punon për të shpikur vaksinën që e lufton, në Shqipëri na ka përfshirë korrupsionvirusi, që nuk ka vaksinë që e parandalon. Ajo është një “smëundje infektive”, që ka prekur fort këshillin e ministrave, deputetë, kryebashkiakë, zyrtarë të administratës shtetërore, policë bashkiakë, tatimorë dhe doganierë. Ata “vuajnë prej kohësh” nga kjo sinptomë që shërohet me zbatim ligji, por ky i fundit ende po gatuhet në laboratorët e gjoja drejtësisë së re, por që deri më tani nuk ka asnjë shenjë se do të jetë “gati për injektim”.
Raportet më të fundit ndërkombëtare e rendisin Shqipërinë si vendin më të korruptuar në Europë, madje njësoj si shtetet afrikane. Korrupsioni si virus i përhapur edhe më dendur në shtatë vitet e fundit, ka krijuar “imunitet” në Shqipëri dhe as zyrtarucët ndërkombëtarë, të fshehur nën flamuj ambasadash, nuk po ia gjejnë dermanin. Përkundrazi, edhe ata jënë infektuar nga një sinptomë e veçantë e korrupsionvirusit, që quhet “mbështetje e të prekurit”…!
Të vetmit që i kanë shpëtuar korrupsionvirusit janë qytetarët e thjeshtë, të papunët apo punëtorët e ndershëm. Vetëm ata me votë mund të luftojnë këtë virus të tmerrshëm që në mënyrë indirekte merr jetë njerëzish, pasi korrupsionvirusi ka futur në konflikt qytetarët për çështjen e pronës, kanë nxitur krimit të futet në politikë. Sot nuk kërkohet një spital i madh që të izolojë të “prekurit” politikanë, biznesmenë të lidhur me politikën, zyrtarucë të mëdhenj e të vegjël dhe pushtetarë lokal, por duhet një burg i ri për të mbajtur të izoluar këtë sorollop njerëzish.
Jemi ende në paradoks ku vendet e BE-së e shohin mjaft mirë sesi ky virus i tmerrshëm që ka shkatërruar jetët e qytetarëve dhe rrënuar ekonominë, ka vitet që qarkullon në Shqipëri, por sërish edhe ata dështuan. Kanë dështuar me drejtësinë e re, e cila për fatin e keq dhe zhgënjimin masiv të qytetarëve është po aq e vjetër sa e vjetra.
Është krijuar SPAK që u pompua kaq shumë, por sot po kthehet në një fluskë të madhe. Shenjat u dhanë me dosjen 184 e cila ndonëse u transferua nga Dibra drejt “kryeqendrës së hetimeve” në Tiranë, ishin drejtuesit e SPAK që e degdisën sërish në Dibër. Nuk është momenti për të vënë në diskutim se prokurorët janë prekur nga “korrupsionvirusi”, por kanë bërë një marrëveshje të heshtur me elitën e pushtetit duke mos i prekur.
Për të justifikuar disi punën e saj, nuk përjashtohet mundësia që disa zyrtarucë të prekur pak nga kurrupsionvirusi të përfundojnë të izoluar në qeli, por kjo kurrsesi nuk do e luftojë këtë sëmundje të tmerrshme që jeton gjatë në Shqipëri. Duhet gjetur epiqendra e përhapjes së tij, atë vend që askush nuk e prek, në dy godinat e përhimta, në Bulevardin Dëshmorët e Kombit dhe pranë, ngjitur fare me Akademinë e Shkencave. Qytetarët nuk duhet të kenë aspak frikë nga coronavirusi, por korrupsionvirusi që ata i prek indirekt dhe si murtajë u rrënon çdo ditë jetën!
