Ping-pongu për “dosjen 184” vijon! Më 22 Janar, Prokuroria e Dibrës ka shpallur moskompetencë për dosjen dhe i ka dërguar aktet te Prokuroria e Posaçme. Ndërkohë, SPAK me një vendim të datës 27 Janar ka vendosur mospranimin e akteve dhe ridërgimin e dosjes te Prokuroria e Dibrës, thanë burime pranë kësaj prokurorie.
Dosja u hetua fillimisht nga Prokuroria e Krimeve të Rënda. Në korrik të vitit 2019, Krimet e Rënda shpallën moskompetencë dhe dosja kaloi në Prokurorinë e Dibrës. Porkurorja Enkeleda Cami Keshi refuzoi të mbajë dosjen në Prokurorinë e Dibrës. Pas një debati mes dy prokurorive, ish-prokurorja e Përgjithshme Arta Marku e dërgoi dosjen në Prokurorisë së Dibrës.
PD e akuzoi Arta Markun se po varroste dosjen 184 dhe sekretari i Përgjithshëm i PD Gazment Bardhi kërkoi informacion zyrtar në Prokurorinë e Dibrës për dosjen 184 dhe transferimin e e saj tek SPAK. Në 15 janar, Sekretari i Përgjithshëm i PD, Gazment Bardhi kërkoi zyrtarisht të njihej me gjetjet e dosjes dhe kërkoi që dosja t’i dërgohej Prokurorisë së Posaçme Antikorrupsion. Kjo u bë nga Prokuroria e Dibrës, por SPAK vendosi kthimin e dosjes edhe njëherë në organin e akuzës në Dibër.
Dosja “184” bën fjalë për manipulimet e zgjedhjeve në Dibër në votimet e shtatorit 2016 për kryetarin e bashkisë. Procedimi është regjistruar në hetim për veprat “Përdorimi i funksionit publik për veprimtari politike ose zgjedhore” dhe “Korrupsioni aktiv në zgjedhje”.
Hetimet për zgjedhjet në Dibër filluan me kallëzim të Partisë Demokratike në datën 6 shtator 2016. Gjatë përgjimeve një javore të kryera nga prokuroria u interceptuan biseda mes zyrtarëve lokalë të policisë dhe drejtorisë arsimore por edhe deputetëve të PS që organizonin njerëz për të votuar kandidatin e PS Muharrem Rama, i cili rezultoi fitues përballë kandidatit demokrat Sherefedin Shehu. Dosja “184” u rikthye në qendër të vëmendjes pasi gazeta gjermane “Bild” publikoi pjesë nga përgjimet ku mes zyrtarëve të regjistruar ishte edhe kryeministri Edi Rama që përgëzonte stafin e PS në Dibër për rezultatin e arritur.
