“Iute Credit” në Kosovë u ndalua publikisht nga autoriteti i Bankës Qendrore të Kosovës. I njëjti pronar është atje, “Iutecredit Europe”. I njëjti grup estonez edhe këtu. Përse Banka e Shqipërisë hesht?
Bordi Ekzekutiv i Bankës Qendrore të Kosovës mori një vendim drastik kur mbylli dy institucione financiare mikrokredie “Iute Credit” Kosovë dhe “Monego”.
Këtë vendim Banka Qëndrore e Kosovës e njoftoi në një konferencë të jashtëzakonshme për median. Guvernatori i BQK tregoi për opinionin publik se po mbyllnin dy kompani mikrokrediti që kishin aplikuar norma tepër të larta interesi në kredi dhe jashtë çdo standarti të lejur. Guvernatori njoftoi popullatën e Kosovës se “Normat shumëfish të interesit që kishin aplikuar këto dy kompani në kredi ishin jashtë çdo standarti” dhe “këto dy kompani jo vetëm kanë rrezikuar interesat e huamarrësve kosovarë por kanë paraqitur rrezik dhe për stabilitetin financiar në vend”. Guvernatori i BQK tha publikisht se “BQK nuk do të lejojë asnjëherë që kompani të tilla mikrokrediti që nuk zbatojnë kërkesat rregullative dhe ligjore të vendit dhe të cilat shfrytëzojnë kushtet e vështira financiare në të cilat gjendet një pjesë e popullsisë, duke sjellë shërbime që e varfërojnë dhe e vështirësojnë më tepër jetesën e tyre, të lejohet të vazhdojnë aktivitetin”.
Por në Shqipëri, që institucionet e njëjta bëjnë “kërdinë”, kush po i kontrollon?! Guvernatori Sejko hesht dhe vazhdon të na tregojë se është bërë ortak me to. “Iutecredit Albania” në Shqipëri me nipt L42011023U, me aksionar “AS IuteCredit Europe”, drejtohet nga Akan Ajdini (ish bankier i BKT) që me manovra financiare të nëjta kanë zhvilluar të njëjtin aktivitet në kurriz të popullatës këtu. Estonezët Tarmo Sild, Allar Niinepuu dhe Kristel Kurvits, anëtarët e Këshillit Mbikëqyrës të “iutecredit Albania” drejtojnë operacionet e mikrokreditit nga Estonia në Shqipëri duke u ndihmuar nga shqiptarë që nuk i kontrollon asnjë institucion. Për më tepër, Banka e Shqipërisë. Para disa muajsh, estonenzët e “Iutecredit Albania” që kishin në pronësi 100% të kompanisë “Final” shpk me nipt K81311012P, një tjetër shoqëri mikrokrediti, ia shitën aksionet e tyre 1 miliard lekë një shqiptari nga Tirana me bekgraund negativ përballë institucioneve shqiptare. Arben Meskuti, pronari i ri i mikrokredi “Final” shpk, individ me problem me drejtësinë, pasi është ndaluar nga Ministria e Drejtësisë të ushtrojë profesionin e avokatit dhe përmbaruesit, po drejton të njëjtën skemë financiare me norma interesi kredie jashtë çdo standarti, njësoj si Shpend Maxhera në Kosovë dhe Akan Ajdini në Shqipëri.
Autoriteti i Konkurrencës, Shoqata e Bankave apo Drejtoria e Parandalimit të Pastrimit të Parave deri sot po heshin. Duket si një komplot shtetëror i organizuar ku askush nuk flet apo vepron mbi këto institucione.
“Iute Credit” në Kosovë u ndalua publikisht nga autoriteti i Bankës Qendrore të Kosovës. I njëjti pronar është atje, “Iutecredit Europe”. I njëjti grup estonez edhe këtu. Përse Banka e Shqipërisë hesht? /Newsbomb
