Kreu demokrat Lulzim Basha ka mbledhur grupin parlamentar të PD-së, një ditë pasi Kuvendi miratoi paketën anti-shpifje dhe gjyqtari Artan Gjermeni dënoi me 1 vit burg ish-ligjvënësin Ervin Salianji lidhur me çështjen e njohur si Geron Xhafaj.
Basha tha se me paktën anti-shpifje Rama po synon t’i mbyllë gojën mediave, duke ushtruar presion ndaj kujdo që hedh dritë mbi abuzimet dhe korrupsionin qeveritar.
Kreu demokrat tha se po kështu me vendimin e djeshëm të gjyqtarit Gjermeni, Rama synon t’i mbyllë gojën opozitës, e cila ka denoncuar lidhjet e qeverisë me krimin, grabitjen e fondeve, PPP korruptive dhe korrupsionin galopant.
“Gjendja ekonomike dhe kriza politike është rënduar pas dështimit të qeverisë për të menaxhuar pasojat e tërmetit dhe ka një përpjekja kriminale për t’i mbyllur gojën mediave.
Ervin Salianji mori dënim politik, sepse denoncoi përfshirjen në trafik droge të ministrit të Brendshëm.
Dënimi i Salianjit tregon se si po e përdor Rama drejtësinë. Tahiri, që kanabizoi Shqipërinë me Ramën, dënohet me pune në shërbim të komunitetit, ndërsa Salianji që denoncoi trafikun e drogës, dënohet me burg”, raportohet të ketë thënë Basha.
Në vijim, ai ka komentuar edhe shtyrjen e gjendjes së emergjencës me 3 muaj, duke shtuar se ajo u zgjat jo për t’u ardhur në ndihmë qytetarëve, por për të justifikuar mungesën e vullnetit të tij për të plotësuar kushtet e vendosura nga Bundestagu, pa të cilat Shqipëria nuk avancon dot në rrugën e integrimit.
