Forumi Ekonomik Botëror ka publikuar së fundmi raportin e hendekut gjinor 2020, një raport vjetor më i rëndësishmi në nivel global në drejtim të barazisë gjinore. Sipas këtij raporti, Shqipëria është një prej vendeve më të barabarta në botë, sa i përket barazisë gjinore. Raporti i këtij viti e rendit Shqipërinë në vendin e 20 mes 153 shteteve, që do të thotë në krahasim me vendet e tjera të rajonit, Shqipëria është e para.
Për vendin tonë ky është një përmirësim me 14 pozicione krahasuar me renditjen e vitit të kaluar, ku renditeshim të 34-tit. Pikëzimi i Shqipërisë sinjalizon një nivel barazie gjinore në 76%, ndërkohë që vendi i parë në listë, Islanda e ka në 85%, dhe vendi i fundit, Yemeni, në 49%.
Sipas kësaj renditje, të jesh femër në Shqipëri ke një nivel barazie me gjininë tjetër më shumë edhe se në vende si Belgjika, Australia, Portugalia, Shtetet e Bashkuara të Amerikës apo edhe Holanda.
Por sa i përket shëndetit dhe mbijetesës Shqipëria ka bërë hapa prapa, nga vendi i 134-tët në botë, në të 145-tin sot, pra një prej 8 vendeve me rezultatin më të dobët në botë. Renditja e dobët në këtë drejtim vjen për shkak të normës së pabarabartë në lindje, mes femrave dhe meshkujve. Fakti që familjet shqiptare lindin më shumë meshkuj se femra, e vendos vendin tonë të 147-tin në botë, ndër 153 shtete.
/Gazeta Tema
