Paketa “anti-shpifje” e qeverisë, e cilësuar si një projektligj që synon të kapë mediat dhe të cënojë lirinë e shprehjes, pritet të miratohet në Kuvend këtë të mërkurë.
Gazetarë dhe shoqëria civile, që kundërshtojnë ligjin, po zhvillojnë një protestë para parlamentit. Nga tubimi, iu bë thirrje Presidentit Ilir Meta që të kthejë ligjin për rishqyrtim nëse kalon në Kuvend.
Si do të veprojë kreu i shtetit?
“Zoti President, sot në Parlament po diskutohet ligji i ashtuquajtur ‘anti-shpifje’. Ndërkohë gazetarët po kërkojnë që ky ligj të mos dekretohet nga ana juaj. Si do të veproni”, u pyet Meta.
“Të shohim si do të jenë zhvillimet. Unë shpresoj të mos bëhen veprime të nxituara. Çdo veprim i imi do të jetë institucional dhe do të jetë transparent, por nuk mund të gjykoj asgjë”, tha Presidenti për “Ora News”.
Pyetje: Më parë ju jeni shprehur se do ta mbroni me çdo kusht Kushtetutën dhe kishit paralajmëruar një tubim. Por për shkak të fatkeqësisë natyrore ju e shtytë atë tubim. Si do ta veproni tani?
Presidenti: Unë e mbroj Kushtetutën çdo ditë edhe në çdo moment, që nga çasti që kam vënë dorën mbi Kushtetutë, sepse kjo është detyra kryesore e Presidentit të Republikës. Padyshim që kjo nuk është vetëm detyrë e Presidentit, por është e të gjithë popullit shqiptar, i cili e ka miratuar Kushtetutën me referendum më 22 nëntor të vitit 1998 dhe i cili për fat të keq që nga ajo periudhë e deri më tani ka lejuar t’i preket Kushtetuta në kohë të ndryshme, duke tronditur themelet e shtetit të së drejtës, gjë që ndihet sot nga të gjithë qytetarët shqiptarë. Presidenti së bashku me qytetarët do të përforcojnë themelet e Kushtetutës, që u votua më 22 nëntor 1998. Kjo është detyra ime dhe është detyra e të gjithëve ne.
