Pacavure për mediat e ka cilësuar avokati Spartak Ngjela, paketën anti-shpifje të propozuar nga Qeveria.
Në studion e News 24, Ngjela thotë se Edi Rama e ka ndërmarrë këtë nismë për të tërhequr vëmendjen nga tërmeti.
“Edi Rama nuk po drejton, ai është i trembur. Shkon në varrime, shkon takon fëmijë, nuk rri në zyrë, nxjerr paçavuren për mediat dhe synon të shmangë të vërtetën”, tha Ngjela.
Ai shprehu bindjen se gjithçka që po bën Rama tregon se po përpiqet të tërheqë vëmendjen nga situata e tërmetit, që shkaktoi edhe viktima.
“Enver Hoxha lëshonte broçkullat e tij dhe njerëzit i pranonin nga frika. E varroste të vërtetën me ligj.
Tani Rama po tenton të bëjë të njëjtën gjë, por nuk e bën dot me burg, sikundër e bënte Enver Hoxha, por kërkon t’a bëjë përmes gjobave të larta me synim falimentimin e mediave. Por harron se gjithçka do të shkojë në Gjykatë.
Rama ka frikë, ka humbur ekujlibrin, pasi çdo akt administrativ do të rrëzohej nga gjykata.
Është i implikuar me mafien e ndërtimit, dhe synon të varrosë të vërtetën, përmes një pakete anti-shpifje.
Mediat janë pushteti i 4-ërt që ekzekutivi nuk ka punë fare. Pse nuk ndërhyn te Prokuroria dhe Gjykata?
Liria e shtypit mbrohet me Kushtetutë, çfarë do bëjnë këto me nonsenset që kanë nxjerrë? Këto duan të kapin median me AMA-n, shpifja është vepër penale, kush do e arsyetojë AMA?”, tha Ngjela.
