Përditësuar/ Vendoset sekuestro preventive për një sipërfaqe toke të mbjellë me pemë në Radhimë, që kap vlerën 2.3 milionë eurove. Sipas hetimeve, dyshohet se toka është përfituar nga 54-vjeçari Aleksandër Lagji, me anë të falsifikimit të dokumenteve.
“Seksioni për Hetimin e Krimit Ekonomik e Financiar pranë Drejtorisë Vendore të Policisë Vlorë, nën drejtimin e Prokurorisë së Vlorës, ka bërë ekzekutimin e një vendimi të Gjykatës së Rrethit Gjyqësor Vlorë, për vendosjen e masës së sigurisë pasurore ‘Sekuestro preventive'”, njoftoi policia. Kjo sekuestro është bërë mbi sipërfaqen 23 000 m2, e mbjellë me pemë në zonën e Radhimës, vlera financiare e së cilës kap shifrën rreth 2.3 milionë euro.
Ky sekuestrim pasuror u bë në kuadër të hetimit ndaj 54-vjeçarit, si person i dyshuar për kryerjen e veprave penale “Pastrimi i produkteve të veprës penale ose veprimtarisë kriminale” dhe “Falsifikimi i dokumenteve”.
Nga hetimet e kryera, ka rezultuar se ky shtetas dyshohet ta ketë përfituar këtë sipërfaqe pemëtore me anë të falsifikimit të dokumenteve.
