Partia Demokratike do të bëjë publike në fillim të muajit janar propozimet e saj lidhur me reformën zgjedhore, në një proces konsultimi me qytetarët dhe grupet e interesit. Kjo u bë e ditur nga Sekretari për Ccështjet Zgjedhore të PD, Ivi Kaso, i cili nga studio e Euroneës, tha se opozita nuk do të marrë pjesë në asnjë mbledhje të Komisionit Ad-Hoc për Reformën Zgjedhore.
“Tashmë ndërkombëtarët e dinë që kjo mazhorancë nuk mund të bëjë reformë. Në anën tjetër kjo mazhorancë kërkon të gënjejë shqiptarët me tryeza ku të thotë se edhe opozita është pjesë. Ne nuk do të marrim pjesë në asnjë tryezë apo takim, dhe muajin e ardhshëm do të nisim konsultimet me qytetarët mbi propozimet tona për reformën zgjedhore. Është një draft me ekspertizën më të lartë në fushën zgjedhore”, tha Kaso.
Sipas tij, grupi i ekspertëve të PD dhe opozitës e kishte gati platformën, por për shkak të situatës së krijuar për shkak të tërmetit të 26 nëntorit, e gjithë agjenda u shty.
“Kemi bërë të ditur se PD nuk merr pjesë në asnjë nga mbledhjet e komisionit të posaçëm për reformën zgjedhore, që për ne është ilegjitim, por jemi të gatshëm të marrim pjesë në tryeza të vërteta konstruktive që synojnë të adresojnë probleme të vërteta të zgjedhjeve, që kryesisht janë organizuar nga ata që e kanë për zemër rritjen e standardeve zgjedhore në Shqipëri. Pra, partnerët tanë ndërkombëtarë, që na kanë asistuar gjithmonë dhe kanë shprehur gatishmërinë për të dhënë zgjidhje të vërteta dhe jo tryeza fasadë”, tha Kaso.
Ish-deputeti demokrat shpjegoi se puna e PD, pavarësisht mungesës së saj, ka vijuar krahas komisionit të ngritur nga mazhoranca dhe përfundimet e veta PD do t’i bëjë me dije në muajin janar.
“Nga fillimi i janarit do të jetë koha kur do të shpalosim zgjidhjet tona, platformën tonë dhe do t’i ndajmë me publikun. Më pas këtij momenti mazhoranca nuk ka më asnjë alibi për të shtyrë miratimin e zgjidhjeve, një pjesë të të cilave i kanë, një pjesë do i ofrojmë ne dhe janë të certifikuara. Ato zgjidhje që ne do të japim janë të praktikave më të mira sot, në kuadër të vendeve të OSBE ku ne bëjmë pjesë”, tha eksperti i PD.
