Ish-deputeti dhe kreu i LZHK-së, Dashamir Shehi, e konsideroi një show sjelljen e Kryeministrit Edi Rama pas tërmetit të 26 nëntorit.
I pranishëm në emisionin “360gradë”, Shehi tha se situata është politizuar nga ana e mazhorancës.
Shehi e konsideron kryeministrin Rama si një sulltan të vogël që bredh nëpër Shqipëri, duke përdorur varfërinë e popullit shqiptar.
“Situata nuk politizohet. Nuk bëhet për të hipur një person. Kush është ky? Mesia! Ky i ndërton shtëpiat, ky i ngre çadrat, ky i ngroh fëmijët!! Çfarë është ky shtet kështu?! Ky është sulltanat, vetëm injoranca pret që vetëm nga një vjen”, tha Shehi.
Në vijim, ai i ka drejtuar një apel Kreut të Qeverisë, që të mos dalë të takojë njerëzit hallexhinj, pasi ata mendojnë se edhe sikur ti kalojë ai brigadieri i zonës, është shpëtimtari.
“Një sulltan i vogël që bredh poshtë e përpjetë Shqipërisë, merr dhe një hoxhë me vete. Kjo është Shqipëria e 2020, me këtë do ti dalim përballë Evropës ne? Jo, jemi shumë prapa”, tha Shehi.
