Dy vrasje të ndodhura gjatë 24 orëve të fundit në vend. Të dyja atentate të mirë organizuara nga dora e krimit të organizuar. Ndërkohë, ministri i Brendshëm Sandër Lleshaj, ‘krihet’ në Itali duke folur për arritje të policisë shqiptare në goditjen e krimit të organizuar.
Dy atentatet
Mbrëmjen e djeshme, u ekzekutua me armë zjarri Andi Zylyfi 26 vjeç dhe u plagos Ardit Uruçi. Të dy u qëlluan me breshëri plumbash nga një makinë në lëvizje, teksa ndodheshin në një mjet përgjatë aksit Elbasan-Peqin, në fshatin Përparim. Atentati ndaj tyre dyshohet për larje hesapesh mes bandash.
Mëngjesin e sotëm, u gjet i vrarë brenda lokalit të tij 52-vjeçari Enver Boriçi. Dyshohet se krimi ka ndodhur gjatë natës dhe viktima është ruajtur nga autorët. Enver Boriçi ka qenë në lokalin e tij kur dyshohet se një person i maskuar ka hyrë brenda dhe ka qëlluar në drejtim të 52-vjeçarit duke e lënë të vdekur dhe më pas është larguar. Në mëngjes, Boriçi u gjet i pajetë. 52-vjeçari është vëllai i Arben Boriçit. Ky i fundit vuan dënimin për jetë në burgun e Peqinit si pjesëtar i bandës së Lushnjës dhe njihet si krahu i djathtë i drejtuesit të bandës, Aldo Bare. Vrasja e Enver Boriçit dyshohet se ka ndodhur për hakmarrje.
Propaganda e Lleshjat
Sandër Lleshaj ndërkohë, nuk ka asnjë reagim lidhur me krimet në fjalë. Megjithatë, ashtu si shefi i tij politik Edi Rama, ai gjen kohë të bëjë propagandë. Në një njoftim për mediat të shpërndarë nga zyra e shtypit që drejtohet nga Lleshaj, i cili me gjasë do të kujtohet gjatë si ministri që helmoi me gaz-lotsjellës qytetarët e vendit të tij, bëhet e ditur vizita në Itali.
“Ministri i Brendshëm Sandër Lleshaj zhvilloi një vizitë zyrtare në Itali, ku u takua me Ministren e Brendshme italiane, znj. Luciana Lamorgese. Ministri Lleshaj prezantoi progresin e bërë nga Shqipëria në luftën kundër krimit të organizuar…”, thuhet në njoftim.
Lleshaj flet për progres, ndërkohë krimi i organizuar ka goditur përgjakshëm duke marrë dy jetë njerëzish në pak orë…
/Boldnews.al/
DENONCO