Tërmeti i 26 nëntorit dhe ajo çfarë pasoi më pas nxori zbuluar korrupsionin e pushtetit lokal me ndërtime aspak cilësore.
Kreu i LZHK-së, Dashamir Shehi, i ftuar në RTV Ora bën përgjegjës të gjithë aktorët politikë, përfshirë veten, për rrumballën urbanistike në vend.
E megjithatë “pjesën e luanit” ia faturon qeverisë Rama dhe PS, duke deklaruar se Tirana dhe Durrësi, 2 prej qyteteve të dëmtuara rëndë nga tërmeti, prej vitesh me radhë drejtohen nga socialistët, apo siç preferon ai ti quajë, “Rilindja”.
Shehi: Në këtë rrumpallë shqiptare urbanistike kemi të gjithë nga një faj, përfshirë dhe të nënshkruarin. Por fajin kryesor e ka ky njeri (Rama) për një sërë rrethanash që janë të matshme. Nga 2000 është kryetar i bashkisë së Tiranës, hiq 4 vjeçarin e Bashës. E ka drejtuar e majta, Rilindja. Durrësin, qyteti i dytë më i dëmtuari, 20 vjet që e drejton Rilindja, personalisht po ky. Është i vetmi njeri që ka firmosur me 4-5 kryeministra si kryetar bashkie dhe tani po i firmos po vetë si kryeministër.
Nuk ka njeri tjetër në historinë e Shqipërisë që të ketë firmosur kaq shumë pallate, rrugë, shembje, rishembje, ndërtime, rindërtime. Nga kjo pikëpamje jemi të gjithë fajtorë që nga qeveria e parë. Por kjo babëzi ka ndodhur pas ’97. Kush e bëri Tiranën në këtë gjendje? Kush ka qenë kryetar për këto 20 vjet? Ky që do ta rregullonte Shqipërinë, pse nuk e bëri? Po të kontrollohej situata në Thumanë mundet që ata hallexhinjtë të kishin shpëtuar. Por ne nuk po ankohemi për këtë punë. Po ankohemi që ky teatër i kotë të mbarojë.
