Andi Zylyfi, 26-vjeçari i cili mbeti i vdekur nga atentati i ndodhur mbrëmjen e sotme në aksin Elbasan-Peqin ka lidhje gjaku me Endrit Alibej. Burime policore thane se Zylyfi është kushëri i Alibej, i cili u vra para një viti, në atë që u quajt masakra e Elbasanit.
Masakra e Elbasanit
Më 29 dhjetor të një vit më parë, në Bradashesh të Elbasanit, 3 persona u vranë, mes tyre edhe një shtetas i huaj. Dy shqiptarët e vrarë ishin Endrit Alibej, 34 vjeç, dhe Arben Dylgjeri, 56 vjeç, kushërinj me njëri-tjetrin. Viktima e tretë ishte shtetasi turk Erdal Durunay, 51 vjeç. Të tre ndodheshin në një makinë ndaj së cilës u qëllua me breshëri plumbash nga një tjetër mjet.
Edhe pse ka kaluar thuajse një vit për këtë ngjarje, autorët janë ende të lirë. Është raportuar se pista kryesore e atentatit lidhet me përplasjen e bandave dhe prishjen e pazareve të drogës.
Kushëriri i Tarzanit
Në një artikull të publikuar pas atentatit në Elbasan, italiania “La Stampa” shkruante për të kaluarën e Endrit Alibej, i cili njihej edhe si “Tarzani”.
Kushëriri i Andi Zylyfit, siç raportojnë mediat italiane, ishte i njohur për pjesëmarrjen në trafikun e drogës.
Endrit Alibej, është arrestuar në vitin 2013 si pjesë e një grupi që trafikonte drogë nga Shqipëria drejt Italisë.
Ai u vu në pranga bashkë me të vëllanë. Sipas hetuesve, ata ishin kokat e një grupi që trafikonte drogë në veriun e Italisë.
