Çela takim me prokurorët e Tiranës, çfarë u diskutua

Prokurori i  Përgjithshëm, Olsian Çela zhvilloi sot një takim në ambientet e Prokurorisë Tiranë me prokurorë dhe drejtues të këtij institucioni.

Në një njoftim për mediat, zyra e shtypit e Prokurorisë së Përgjithshme ka zbardhur temat e diskutimit.

“Në takim u diskutuan probleme që lidhen me funksionimin e policisë gjyqësore, vleresimin e performancës së saj, organizimin e punes pas rritjes së numrit të prokurorëve në këtë prokurori, çështje që lidhen me zbatimin e ligjit për prokurorinë, pavarësinë dhe përgjegjshmërinë e prokurorëve, ndërtimin e një sistemi efikas të monitorimit të zbatimit të ligjit në këto aspekte, si dhe u trajtuan  çështje që lidhen me zbatimin e ligjit, ‘Për parandalimin dhe goditjen e krimit të organizuar’”, thuhet në njoftim.

LEXO EDHE  Përplasja me armë me rojën që zbuloi parcelat me kanabis/ Historia e të riut të ekstraduar nga Greqia

“Në fokus  të vecantë të takimit ishte mbështetja që Prokurori i Përgjithshëm  Z. Olsian Çela  i ofroi drejtuesve dhe prokurorëve të kësaj prokurorie  për procedimet që lidhen me dëmet e shkaktuara nga tërmeti i datës 26  Nëntor, përmes sigurimit të asistencës teknike dhe ekspertizës që do të ndihmojnë  në  hetimin e shpejtë dhe të plotë të rasteve. Ai inkurajoi prokurorët të kryejnë hetime gjithëpërfshirëse, për të individualizuar autorët e veprave penale dhe për t’i vënë ata para përgjegjësisë penale”, vijon njoftimi.