Nga Boldnews.al
Gjykata e Tiranës kërkon nga redaksia e “Boldnews.al” përgënjeshtrimin e tre artikujve që lidhen me Rea Xhillarin, vajzën e bashkëshortes së kryeministrit Edi Rama, në një proces gjyqësor që duket si një investim i tepërt, të paktën sa i përket agjencisë informative on-line që drejtohet nga gazetari Jetmir Olldashi.
Në Shkurt dhe Prill 2019, “Boldnews.al” ka ripostuar në hapësirën e saj shkrime, me autorë të ndryshëm, nga portale të tjerë, të cilët ngrinin dyshime për një bashkëjetesë të mundshme mes Rea Xhillarit dhe ministrit të Jashtëm në detyrë, Gent Cakaj.
Redaksia e “Boldnews.al”, gjithashtu, në respekt të barazisë “së palëve” dhe konform parimeve gazetareske, ka publikuar në 24 Prill 2019, edhe një reagim të Xhillarit, të publikuar në media të ndryshme, e cila përgënjeshtron publikimet në media.
Pra, atë që gjyqtari i Gjykatës së Tiranës, Julian Haxhiu, kërkon me vendimin e sotëm (e Martë, 10.12.2019), “Boldnews.al” e ka realizuar, me vetëdije të plotë, rreth 6 muaj më parë, pa u kërkuar nga askush.
Pala paditëse, në këtë rast znjsh. Xhillari dhe përfaqësuesit ligjorë të saj, i kishin të gjitha mundësitë që të kërkon përgjënjeshtrimin/sqarimin e situatës, duke iu drejtuar drejtëpërdrejtë redaksisë së “Boldnews.al” dhe kujtdo tjetër që ka publikuar dyshimet për raportet e saj me Cakajn.
Por, pala paditëse, megjithëse ka pasur të gjitha mundësitë për të kontaktuar me redaksinë e “Boldnews.al”, përfshirë adresë zyrtare, adresë elektronike, kontakte telefonike, të gjitha të publikuara në faqen zyrtare, në regjistrin e Qendrës Kombëtare të Regjistrimit (QKR) dhe në Autoritetin e Komunikimeve Elektronike e Postare (AKEP), ka anashkaluar kontaktimin e drejtëpërdrejtë, duke iu drejtuar gjykatës.
Kjo e fundit, megjithëse në një proces ku drejtuesi i “Boldnews.al”, Jetmir Olldashi, nuk ishte informuar në pjesën më të madhe të procesit për padinë ndaj tij, vendosi, pikërisht atë që vetë redaksia e kishte realizuar më parë; “përgënjeshtrimin”, në formën e publikimit të versionit të znjsh. Xhillari.
Në konkluzion, rezulton se gjyqtari Julian Haxhiu është investuar për rreth 6 muaj (nga dorëzimi i padisë në Prill 2019 deri në 10 Dhjetor), për një vendimmarrje të tepërt, duke kërkuar një “përgënjeshtrim”, i cili, në një formë alternative, ishte realizuar që para depozitimit të padisë.
Gjithësesi, shqyrtimi gjyqësor, të paktën në rastin e gazetarit Olldashi, është kryer në shkelje proceduriale, të cilat pritet të jenë objekt ankimi në Gjykatën e Apelit.
