Shkolla “Emin Duraku” një nga të dëmtuarat nga tërmi i 26 nëntorit ishte sot në qendër të vëmendjes, për shkak se prindërit nuk kanë pasur siguri për të lënë fëmijët në një objekt që nuk është çertifikuar si i sigurtë.
Madje prindërit kanë bërë edhe një peticion drejtuar ministres së Arsimit, të cilës i kërkojnë ose dhënien e garancive mbi sigurinë e objektit, ose mbylljen e shkollës dhe zhvendosjen e fëmijëve në një tjetër mjedis.
E gjithë kjo situatë pasigurie e prindërve për fëmijët, është shoqëruar me një skandal nga policia bashkiake, e cila ka zbarkuar në zonën ku ndodhet shkolla Emin Duraku duke gjobitur automjetet e parkuara anash rrugës.
Pavarësisht pranisë së drejtuesve të mjeteve, që janë prindër të fëmijëve që studiojnë në këtë shkollë 9 vjeçare, policët e Lalit, kanë mbushur fletët e gjobave, duke shfrytëzuar ndoshta edhe situatën e pasigurisë që kanë prindërit për fëmijët, për shkak se objekti shkollor është klasifikuar si i dëmtuar nga tërmeti i 26 nëntorit.
Në vend që Bashkia e Tiranës e drejtuar nga Erjon Veliaj të dërgonte policë për të vendosur gjoba, do të ishte më mirë që të dërgonte grupe ekspertësh për të verifikuar sigurinë e ndërtesës dhe të qetësonin prindërit.
Por jo, duket se kjo situatë stresi dhe pasigurie të dhjetra e dhjetra prindërve është shfrytëzuar për të mbushur arkën përmes gjobave.
Ndoshta kjo është mënyra që Lali ka zgjedhur për të larguar prindërit nga dyert e shkollës “Emin Duraku”, një prej ndërtesave e rikonstruktuar nga Bashkia, por që nuk përballoi dot tërmetin e 26 nëntorit, sipas akt-ekspertimit të Institutit të Ndërtimit.
