Nga Boldnews.al
Diku në orën 05.30 të së martës tragjike pas tërmetit të fuqishëm 6.4 të shkallës Rihter, Rama u pa në Durrës. Udhëtoi plot shqetësim dhe ndoshta ky ishte momenti i parë dhe i fundit i sinqertë. Rama u gjend aty me 14 troproja pranë pallatit të rrënuar, që për fatin e keq rezultoi me shumë viktima, oficerë garde kishte plot, por asnjë grup shpëtimi, pak policë dhe një kaos i madh fare e mirëkupuar në situata të tilla, edhe pse qeveria e shteti nuk duhet të humbnin torruan.
Gjithçka që pasoi nga ai moment e në vijim, sapo nisi të zbardhte dita, është shfaqje, spektakël televiziv, propagandë dhe formë për të treguar se qeveria është si banorët e prekur, me ata dhe për ata. Në ditët e para, Rama shfaqi edhe përlotje, prekje në disa raste, sidomos kur ishte në transmetim live. Atëherë kur e gjithë Shqipëria lotonte e lëngonte, edhe kreu i qeverisë tentoi të tregonte se jam si ju.
Më pas, sa më shumë kalonte koha kaloi në planin “B”, që në gjuhën e agjitpropit (agjitacionit dhe propagandës) konsiderohet si unifikim me qytetarët, por edhe mbulim të problemeve. Ata shprehnin hallin e banesave dhe ai jepte premtime. I dërgoi shumë të pastrehë nëpër hotele, shpesh i vizitonte, hidhte ndonjë batutë dhe priste reagimet. Shumë puthje e përqafime “shpenzoi” kreu i qeverisë, ndërsa nuk e ndau nga goja “Shqipëria solidare”…, një formë që mbijeton edhe në raste normaliteti, pavarësisht anormalitetit tonë.
Shpejt u kthye në origjinë. Tentoi për të mposhtuar mediat, që në çdo formë nxorrën zbuluar problemet e shumta që pati në organizimin e shtetit dhe mbi të gjitha në lënien padore me mjete dhe logjistikë të grupeve të Emergjencave Civile. “Mos u besoni portaleve dhe disa mediave”-këmbënguli Rama. Për më shumë ai edhe kërcënon në çdo çast, duke i treguar medias se ligji i Gjendjes së Jashtëzakonshme ia jep atributin qeverisë që të urdhërojë mbylljen e mediave, që ai i konsideron se po përhapin panik.
Në të vërtetë çështja nuk është në përhapjen e panikut, por në zbulimin e të vërtetës së hidhur që erdhi prej tërmetit. Në zonën bregdetare të Durrësit, është bërë batërdi me ndërtimet, fatkeqësisht për kreun e qeverisë i dolën zbuluar ata drejtues dhe ish-drejtues lokal të Rilindjes së tij që nën mburojën dhe arrogancën e pushtetit dhane leje ndërtimi buzë rërës, hodhën firma dhe kolauduan objekte që u shkërmoqën pas lëkundjeve. Kanë ikur 51 jetë njerëzish, por sot pak flitet për përgjegjësinë e atyre që realisht i shkaktuan, pasi nuk ikën nga kjo botë vetëm nga fatkeqësia natyrore, por edhe nga makutëria njerëzore e zyrtarëve të pangopur.
Vërtetë Rama shprehet që qytetarët të mos i besojnë medias, por qytetari e ka para syve të vërtetën, pa pasur nevojë që problemin ta shohë nga TV-të, apo të futet në rrjetet sociale për tu informuar. Qytetari e di mirë që banesën të cilën ai e bleu me stërmundim e ndërtoi një politikan, një biznesmen dallaveraxhi dhe lejen e dha një zyrtar pis pushtetar. Qytetari nuk ka nevojë të shohë mediat për të kuptuar se grupet e inspektimit nuk po i vinin në kohë.
Qytetari i prekur është vetë “gazetar” e “redaktor”, pasi para syve ka shtëpinë e rrënuar, sheh një drejtues të lartë policie që bashkë me gruan kryesocialiste të deklaruar vidhte ndihmat e dhënë nga qindra e mijëra qytetarë të mirë shqiptarë, brenda e jashtë kufijve.
Sot Rama nuk mund të fitojë me propagandë, pasi bota e tij virtuale, nuk ka më asnjë vlerë, sepse mjaftuan 30 sekunda tërmet që të dalin në dritë kaq shumë probleme dhe mbi të gjitha, kaq shumë papërgjshmëri që vjen prej shumë zyrtarëve.
DENONCO