“Serbia ruan ende mendësinë kriminale të Millosheviçit”, Haradinaj akuza të forta Vuçiçit

Pas deklaratës së presidentit serb Aleksandër Vuçiç i cili tha se masakra e Reçakut në Kosovë është e trilluar, ka ardhur dhe reagimi nga kryeministri në detyrë i Kosovës, Ramush Haradinaj.

Në një postimi në Facebook, Haradinaj ka theksuar se urrejtja patologjike e Vuçiçit ndaj shqiptarëve, po dëshmohet edhe nga deklaratat e tij se masakra e Reçakut e cila tronditi mbarë botën në vitin 1999, është e fabrikuar.

Sipas Haradinajt dëshmohet qartë se Serbia edhe në aspektin institucional e ruan paturpësisht mendësinë kriminale të Millosheviçit.

Postimi i Haradinajt:

Urrejtja patologjike e Vuçiqit ndaj shqiptarëve, po dëshmohet edhe me deklarimin e tij të fundit, “se masakra e Reçakut e cila tronditi mbarë botën në vitin 1999 është e fabrikuar”. Ky qëndrim dëshmon qartë se Serbia edhe në formë institucionale e ruan paturpësisht mendësinë kriminale të trashëguar nga koha e Millosheviçit.

LEXO EDHE  Qeveritë e Ballkanit thanë se kishin nën kontroll pandeminë por shifrat tregojnë të kundërtën

Republika e Kosovës është shoqëri shumetnike, e përbërë nga shqiptarët dhe komunitetet tjera dhe urrejtja ndaj secilës etni është vepër e dënueshme me ligj. Është për keqardhje se si Serbia, që konsiderohet si shtet favorit nga BE-ja, vazhdon ta kultivojë urrejtjen etnike ndaj shqiptarëve dhe mohon krimet gjenocidale të saja, duke kontaminuar kështu të ardhmen e tyre dhe duke zvogëluar shanset për paqe dhe pajtim në rajon. RH