Nënkryetari i PD-së, Edi Paloka, ka reaguar përmes një postimi në rrjetet sociale lidhur me shqetësimet e shprehura nga Kryeministri Edi Rama në mbledhjen e sotme të qeverisë.
Paloka thekson se dy shqetësimet e vërteta të tij janë milionat e oligarkëve dhe mos preken përgjegjësit.
“Rama e tregoi dhe nje here sot se kush janë shqetësimet e tij të vërteta pas katastrofës që solli tërmeti i 26 nëntorit . Nuk janë familjet e shqiptarëve që humbën gjithçka e as ato që e rrezikojnë një gjë të tillë! Për Ramën shqetësimi i parë më i madh nuk është shpëtimi i jetës së shqiptarëve, por shpëtimi nga përgjegjësitë i fajtorëve.
Shqetësimi i dytë më i madh për Ramën nuk është garancia dhe siguria e jetës për shqiptarët, po garancia dhe siguria e milionave që ndan me oligarkët.
Fjalët e para që tha sot në mbledhjen e asaj që e quan qeveri , ishin pikërisht kundër atyre që ngrënë zërin për nxjerrjen e përgjegjësive të asaj që ndodhi e që mund të ishte shmangur”, shkruan Paloka.
Në vijim ai shprehet se Rama e tha qartë se “nuk do të ketë përgjegjësi sepse…KÇK nuk ka të drejtë të gjykojë!!!”
Në këtë kuadër, nënkryetari demokrat thekson se sipas logjikës së Ramës edhe krimi mund të bëjë ç’të dojë, sepse KÇK nuk ka të drejtë të gjykojë e dënojë.
Duke vijuar reagimin për deklaratat e Ramës lidhur me PPP-të, Paloka shkruan se ai i përgjysmon pagat mësuesve, por nuk pranon të prekë milionat e oligarkëve në aferat e demaskuara tërësisht si korruptive.
“Rama do vazhdojë të dalë me orë të tëra në ekranet e televizioneve në role të ndryshme; herë si vajtojce me lot fallco, herë si fatorino furgoni, herë si klloun e herë duke sharë e fyer ata që janë vërtetë në hall.
Do flasë poshtë e lartë për lagje të reja e pse jo dhe qytete të reja (në 3D i ka gati) por shqetësimet e tij janë ato që kanë qenë gjithnjë : mbrojtja e krimit dhe milionave të grabitura”, shkruan Paloka.
