Kryeministri Edi Rama deklaroi në Kuvend se abuzime me ndihmat e të prekurve nga tërmeti ka pasur, por shtoi se ato nuk përbëjnë as 1 %.
Rama tha se rastet që ka denoncuar media ekzistojnë, pasi ato që i kanë bërë këto abuzime nuk janë aktorë filmash, por ka edhe nja 30 raste të tjera që nuk janë publikuar.
Kreu i Qeverisë tha se që nga ora e parë kur ndodhi tërmeti dhe u shembën ndërtesat janë fotografuar dhe janë mbledhur provat nga policia kriminale.
“Po punohet në bashkëpunim me prokurorinë, janë marrë dosjet nga bashkitë ku janë dhënë lejet e ndërtimit, por duhen edhe ekspertët.
Ekspertët janë në terren ditë e natë.
Asnjë provë nuk është zhdukur apo fshehur. Gjithçka është fotografuar dhe mbledhur”, tha Rama.
Duke iu drejtuar deputetëve të asaj që quhet si “opozita e re”, Rama tha se “keni probleme me vendosjen e kallëzuesit në fjalitë që ndërtoni, silluni si në shtëpitë tuaja, mos hajdeni këtu edhe na rrokanisni kokën, jo vodhët, jo abuzuat. Ralfi kërkon matrapik për rrënojat, se Ralfin kemi këtu që na sjell haberet”.
Rama i cilësoi deputetët e “opozitës së re” si gërmadhat e mbetura nga tërmeti.
“Ju jeni si ato gërmadhat. Ra tërmeti, rrëzoi opozitën, ju jeni gërmadhat”, iu drejtua Rama, duke shtuar se nuk e thotë me të keq këtë gjë.
