Java e 15-të e Premier Ligës vazhdon dhe ditën e sotme, ku shumë nga skuadrat e mëdha zbresin në fushën e lojës.
Kryendeshja e kësaj jave është padyshim sfida në “Old Trafford”, mes Manchester United dhe Tottenham Hotspur.
Mourinho i cili vetëm para dy javëve u caktua si trajner i Tottenham, rikthehet në “Old Trafford një vit pas shkarkimit të tij si trajner i “djajve të kuq”, një ndarje që nuk u mbyll mirë mes palëve. Në këtë ndeshje portugezi do të kërkojë “hakmarrjen” ndaj ish-klubit.
Nuk është një ndeshje e rëndësishme vetëm për Mourinho, pasi për trajnerin aktual të Man.Utd, Ole Solskjaer, sfida e sotme dhe ajo e tre ditëve më pas ndaj Manchester City mund të vendosë për fatin e tij te United, pasi sipas mediave angleze ai rrezikon postin drejtues.
Përpara kësaj sfide, Tottenham renditet në vendin e gjashtë me 20 pikë ndërsa United në të 10-in me 18 pikë të grumbulluara.
Në ndeshjet e tjera Chelsea luan në shtëpi ndaj Aston Villas ku vjen pas dy humbjeve radhazi, ndërsa një sfidë tjetër mjaft e fortë është derbi mes Liverpool dhe Everton e cila luhet në “Anfield”.
