Pas Prokurorisë së Durrësit, edhe Prokuroria e Tiranës ka nisur hetimet për “shpërdorim detyre” dhe ndërtim pa leje pas tërmetit shkatërrues të 26 Nëntorit i cili la si pasojë viktima, qindra të plagosur dhe mijëra të pastrehë.
Prokuroria e Tiranës njofton se për banesat e dëmtuara nga tërmeti në Tiran si dhe për ato ndërtesa që janë shpallur të pabanueshme po i kërkohet informacion Bashkisë së Tiranës lidhur me lejet e ndërtimit të dhëna për këto objekte.
Njoftimi :
Prokuroria e Rrethit Gjyqësor Tiranë ka filluar kryesisht hetimet në lidhje me situatën e krijuar nga fatkeqësia natyrore. Hetimi ka si objekt kryerjen e veprimeve të shpejta në drejtim të sqarimit të rrethanave konkrete, që kanë çuar në pasojat e ardhura dhe gjendjen e ndërtimeve. Veprat penale që po hetohen janë ato të “Shpërdorim detyre”, parashikuar nga neni 248 i Kodit Penal, ku do hetohet për organet qe kanë miratuar lejet e ndërtimit dhe nëse ato janë dhënë në mbështetje të ligjit, si dhe nëse ndërtuesit kanë respektuar lejen e marrë, “Ndërtim i paligjshëm”, parashikuar nga neni 199/a i Kodit penal, si dhe “Dhënia e ndihmës për ndërtim të paligjshëm”, neni 199/b i Kodit Penal. Në lidhje me këtë hetim Prokuroria e Rrethit Gjyqësor Tiranë, ka ngritur një grup hetimor. Në vijim të veprimeve të kryera, i kërkohet informacion Bashkisë së Tiranës për banesat e evidentuara tashmë si të prekura nga termeti dhe të klasifikuara jo në kushtet e duhura për banim. I njëjti informacion i është kërkuar dhe strukturave të tjera shtetërore.
