Në takimin e zhvilluar nga kreu I opozitës Lulzim Basha me personalitete të inxhinierisë, sizmiologjisë, gjeologjisë, pedagogë, ekspertë të emergjencave civile inxhiniere Mimoza Hysaj nga Durrësi , e trajtoi çështjen në 3 drejtime kryesore.
1.Në menaxhimin e burimeve njerëzore
2.Në ekspertizë
3.Në legjislacion
Inxhinierja tha se në aspektin njerëzor, emergjencat nuk kanë funksionuar. “Nuk kishte asnjë plan për raste të tilla, siç ka në çdo vend të botës. Qytetarët e Durrësit nuk dinin ku të trokisnin. Edhe sot vazhdon sorollatja e tyre. Akoma nuk gjejnë mundësitë të komunikojnë me autoritetet për të shprehur shqetësimin e tyre.’
Lidhur me verifikimin e objekteve, inxhinierja bëri të ditur se në Durrës nuk ka akoma grupe verifikimi dhe ky është një problem, pasi ajo e sheh situatë të rrezikshme shumë pallate që duken me fasadë të rregullt. “Ajo që kam konstatuar këto ditë nga disa inspektime që kam bërë vetë privatisht dhe me disa kolegë të tjerë është se ka apartamente të shkatërruara, që janë bashkuar me njëri-tjetrin, pavarësisht dukjes jo shqetësuese të fasadës “- u shpreh e shqetësuar ing. Mimoza Hysaj.
Përsa i përket funksionimit të ligjit, inxhinier Hysaj propozoi ndryshimin e ligjit për Planifikimin e Territorit, duke bërë të detyrueshëm në ndërtim studimet sizmiologjike dhe gjeologjike. “Mendoj që pjesa e studimit gjeologjik dhe sizmik të bëhet detyrim ligjor, pasi, aktualisht, është vetëm rekomandimdhe jo gjithmonë respektohen nga arkitekti dhe konstruktori. Është shumë e rëndësishme që detyrimet ligjore të shikohen me përpikmëri dhe të zbatohen”- tha inxhiniere Mimoza Hysaj.
Ajo ngriti pyetje të vlefshme lidhur me ndërtimet në zonën e Kënetës dhe të mosfunksionimit të IKMT-së. “IKMT nuk është vetëm për të prishur objektet. Në rradhë të parë është për të parë zbatimin e këtyre objekteve që kanë marrë leje ndërtimi. Me të drejtë u tha këtu që në Kënetë nuk duhet ndërtuar, pasi njihen njollat gjeologjike. Pyetja është kush i ka dhënë këto leje ndërtimi? Pse janë dhënë? Pse disa ndërtojnë dhe nuk kontrollohen, ndërsa disa kontrollohen edhe për gjënë më të vogël? Ne vetëm flasim për standard europianë, por, de fakto nuk i kemi.” – theksoi inxhiniere Mimoza Hysaj në takimin e thirrur nga Kryetari i PD, Lulzim Basha me disa nga ekspertët më të mirë në vend në fushën e ndërtimit, gjeologjisë, sizmiologjisë dhe emergjencave civile.
