Tedi Blushi, zëdhënësi i presidentit Ilir Meta ka reaguar në lidhje me lajmin e publikuar ditën e sotme nga Gazeta Tema, ku aludohej se një banor i prekur nga tërmeti pretendon se shoqëruesi i kreut të shtetit i ka kërkuar të mos flasë.
Në një postim në “Facebook’, Blushi ka hedhur poshtë këto pretendime dhe ka sqaruar çdo shqetësim i tyre është dëgjuar dhe mbajtur shënim nga ekipi i Presidentit.
Ai shpreh keqardhje për dizinformacionet nga portali i M.B (Mero Baze). Në fund ai e mbyll postimin e tij: “Turp për këtë gazetari të mjerë.”
Statusi i plotë:
“Keqardhje për dizinformacionet dhe gazetarinë e mjerrë të portalit të M.B-së.
Asnjë shoqërues i Presidentit nuk ka kërcënuar sot asnjë banor.
Çdo shqetësim i drejtë i tyre është dëgjuar dhe mbajtur shënim nga ekipi i Presidentit.
Ankesa e banorit në Shkafane për sjelljen arrogante të Kryeplakut të fshatit i është raportuar autoriteteve përkatëse për verifikim dhe marrje masash.
TURP, TURP, TURP për këtë gazetari të mjerrë!” – shkruan Blushi.
Kujtojmë që ditën e sotme Meta bashkë me shoqëruesin e tij kanë vizituar disa banesa të dëmtuara nga tërmeti i 26 nëntorit në fshatin Shkafanë të Durrësit.
Gjatë kësaj kohe, ata kanë takuar nga afër banorë të shumtë të prekur nga kjo tragjedi.
