Në këto momente është duke u zhvilluar një mbledhje e Komitetin Kombëtar të Rindërtimit, me përfaqësues nga shoqata bamirëse, arkitektë, inxhinierë, Shoqata e Ndërtuesve dhe Fondi i Zhvillimit dhe përfaqësues të Shoqatës së Sipërmarrësve.
Në të është zhvilluar një debat mes kryeministrit Edi Rama dhe Elvis Naçit, pasi kreu i qeverisë mbron idenë e bashkimit të të gjitha donacioneve në një llogari të vetme, por është kundërshtuar në këtë pikë nga Elvis Naçi, i cili është shprehur i gatshëm të bëjë transparencë deri në qindarkën e fundit për donacionet e mbledhura.
“Jam në oponencë me kryeministrin të fortë, që gjithsecili në kampin e vetë dhe të shikojë punën e vetë, unë nuk e quaj të përfunduar nëse ky komision nuk cakton njerëz që të krijojë një komision brenda komitetit që të shikojë bankën dhe të bëjë transparencën që bëjmë ne dhe transparencën që bën komisioni. Ne nuk jemi të politikës por krijojmë modele edhe për politikën. Ajo stepje që bën kryeministri, jo ju i keni vetë, ju s’i keni vetë, nuk ka nevojë. Sepse lekët nuk i ka Elvis Naçi. Ju lutem shumë ua kërkoj këtu që sido që të jetë, të ngreket komiteti dhe të vijë të shikojë numrin e llogarisë si në Zvicër, PayPal, GoFundMe. Ne nuk kemi lidhje si kanë ardhur por”, u shpreh Elvis Naçi.
Kryeministri Edi Rama shpjegoi më tej se si do të zhvillohet procedura që ai propozon:
“E kisha për diçka tjetër se transparenca është minimale. E kisha në sensin e përdorimit, jo në sensin e prejardhjes. Meqë më sfidove, do ta çoj unë përpara sfidën. Do ishte e mira që i gjithë fondi të bashkohej. Dhe mbi atë bazë të ndaheshin projektet dhe secili ndiqte projektet. Gjëja më me vlerë që shoh unë këtu është që të arrijë i gjithë projekti i menaxhimit dhe rindërtimit, i gjithë ky fond është një, dhe pastaj në këtë tryezë kontributet janë të ndryshme. Unë mendoj që ky komitet të trajtojë çështje përtej fondeve. E gjithë bota i ka këto gjëra. Askush s’duhet të ketë shqetësim që ky fond që kam kaluar unë po përdoret në mënyrë korrekte”, tha Rama.
Kujtojmë se fondet që mblidhen nga qeveria menaxhohen nga ish-ministri i Ekonomisë Arben Ahmetaj.
