Dëmtimet e pallateve dhe objekteve në Lezhë si pasojë e tërmetit, ka bërë që qeveria të shpallë gjendjen e jashtëzakonshme edhe në këtë qytet.
Disa prej banorëve janë dërguar në hotelet e Shëngjinit ndërsa një pjesë prej tyre refuzojnë ti braktisin banesat. Ata shprehen se u është thënë nga ana e bashkisë që pallatet janë të pabanueshme, por për ata, duket se është e vështirë të braktisësh banesën.
“Si s’kam frikë por çfarë do bëj. Ta lë shtëpinë e të iki. Ka ardhur deri tek kryeministri, na tha me dal jashtë. Do pres inxhinierët pastaj do vendos. Nuk kam çfarë të bëj, vetë i sëmurë, gruaja me ilaçe. Është zor me dal prej shtëpisë”, thotë një i moshuar.
Një tjetër shprehet se ka qëndruar për të ruajtur shtëpinë. “Banesa ku rrimë nuk është dëmtuar, shkalla po. Ata thonë se është e rrezikshme. Në shtëpi kemi fjetur. Ka ardhur bashkia. Na tha me dal. Por unë kam plaçkat e gjërat, kujt t’ia lë, kush më garanton. Ku me u anku se kemi frikë. Me merak rrimë por nuk kemi shkuar kund”, tha një tjetër banor.
