Magnitudat e tërmeteve në Shqipëri janë me trend rënieje. Kjo u tha nga ministrja e Mbrojtjes, Olta Xhaçka, e cila në një konferencë për mediat i ka drejtuar edhe një apel qytetarëve që kanë banesat të dëmtuara, të mos futen në to duke mos rrezikuar veten e familjet.
“Lajm i mirë është se fuqia e goditjeve ka një trend dukshëm zbritës dhe shpresojmë që janë shenjat se kësaj situatë sizmike po i vjen fundi.
Në jetët e humbura ka pasur një kosto aq të rëndë sa do jetë e paharrueshme sa të kemi jetë, por edhe kosto aq të rënda materiale.
Sot kur operacioni i kërkim shpëtimit po i vjen fundi kujdesi ynë është të garantojmë strehimin e të gjithë atyre që kanë mbetur pa strehë.
Përsëris nëse shtëpia juaj është e dëmtuar ju lutem mos e bëni ekspertin vetë, mos rrezikoni vetën dhe familjen, drejtojuni në strukturat akomoduese, janë me qindra hotelet në dispozicionin tuaj, nëse doni të shkoni tek të afërmit tuaj, por ju lutem mos qëndroni nëse banesat tuaja nëse janë të dëmtuara.
Largohuni për në hotelet më të mira në Durrës, Tiranë, Lezhë, Shëngjin, Berat. Situata në banesat me strukturë të dëmtuar është po aq e rrezikshme sa ditën e parë. Ka nisur vlerësimi i rrezikshmërisë së banesave nga ekspertë shqiptarë e të huaj”, tha Xhaçka.
Ajo shtoi se ekipet tona janë të pranishme në të gjithë zonat e prekura. Sipas vlerësimeve paraprake, mbi 4 mijë banorë e kanë të pamundur të rikthehen në banesa.
